abc cooking :: 完

只係報咗六堂的我，已經上晒lu～


三月時學咗粟子蛋糕：


除咗緣茶之外，粟子蛋糕我都好喜愛的。但原來整個粟子蓉，又要唧出嚟，都幾煩。。。仲要自己手勢差，整得好肉酸囉～～ 味道係好的，但多工，响屋企好難自己整。


淨返兩堂，咁啱想學的兩樣响正同一日，一個上午一個下午，唔駛我走多轉。上午學的係chocolate mousse cake with nuts，其實同之前的tarte au chocolat差不多，但呢個mousse cake就唔駛焗。


真係好好好好味！！好味到拍得住响酒店食到的。喜歡濃厚dark朱古力味的一定會十分喜歡。但上堂時我的忌廉打過龍咗少少，識食的可能會覺得mousse的質感可以再滑啲，但味道真係非常好。


下午學的就係芝麻奶凍加芝麻脆脆薄片。據老師講係全個蛋糕課程最簡單的。的確係喎！個芝麻奶凍真係十分鐘就搞掂（雪凍時間另計），响屋企整返真係零難度。 我已經打算轉頭落街買芝麻醬整喇。



作為黑芝麻粉絲，梗係覺得好好味啦，我出街好少食「奶凍」之類的甜品因為我唔鐘意純奶味甜品（但我又會飲牛奶）。加咗喜歡的黑芝麻連食幾杯都得，嘿嘿。。。


結果一個15cm的chocolate mousse cake + 五杯芝麻奶凍我同陳某兩日就清晒。

二月一記

嘩，一轉眼二月就差不多完。近來天氣凍，加上陳某出trip獨留我在家（！）的關係，呢個星期我在家得閒就閉門煲劇，用咗六日睇了某劇的1至19集。用咁多時間睇劇真係好頽廢，但我一路睇劇一路做好多鍛練的運動，希望可以踢走多餘的肉，修修線條（順道減輕睇劇的罪疚感），食完包朱古力餅都係唔好補倉喇。

近期學咗呢兩款新餅：

抹茶卷－抹茶控的我一定會學呢個！最最最喜歡佢入面的抹茶cream，好濃香啊，當然個紅豆cream都好好味啦。題外話，有日得閒去咗c'est la b 點咗個紅豆cream之類的蛋糕，一啲都唔好食，我覺得自家整呢個紅豆cream好味好多。。。

tarte au chocolat－朱古力控必學，同埋我唔識整撻皮，冇乜信心响屋企自己整到。好多嘢都係，未識整時好似好難，學咗後會覺得其實好易啫！呢個朱古力撻就係咁。咁啱我情人節早上去學整呢個，順理成章就係當晚的情人節甜品喇，好味！　

整餅 @ abc cooking

abc cooking studio十一月中响香港新開張，唔經唔覺我已經响度上咗三堂！

第一堂係trial lesson，學整漢堡同洋蔥湯。我最想學整的就係個汁。



賣相不錯吧！學完响屋企都整咗三兩次，又多一道看門口菜式了。


（對來自日本的完全冇能力抗拒。。。）本來我係好想join料理班，但佢一嚟就係24堂，而佢leaflet又係得24道菜，但我又唔係款款都想學喎。最後決定咗join六堂的蛋糕班，粗粗地試吓先。蛋糕班有我好想學整的crepe cake（次次去greyhound必點！），急不及待就報咗十二月上的crepe cake班喇！



abc 的mille feuille（即crepe cake）同greyhound的有點不同；greyhound的夾層相信係用whipping cream而abc係用custard。但abc的都好好食，陳某食完大讚，話個custard好好味。而個crepe跟佢的材料煮法都好好味好有咬口，質感QQ，淨食都不錯（之後都有响屋企整過），真係有街買的水準！雖然係好食，但真係好花工夫，煎咁多塊crepe真係煎到儍，仲要整custard .... 所以兩樣嘢都係分開搞好啲。話說嚟緊一、二月係屋企的長老們慶生的日子，希望可以整個嚇一嚇佢地，整到的話都應該幾impressive掛。


話說做咗member後，帶朋友上trial class自己就免費呢！所以我心思思想拉陳某一齊上埋蛋糕 trial class或者麫包trial class。自己完全冇整過麫包，就學麫包啦。trial class係學整兩款包，分別係火腿卷同玉桂卷。


自家製麫包的確係幾多功夫（感覺仲難過crepe cake），真係好佩服自己在家手製麫包的人！




新鮮出爐喇！！！陳某整的明顯地靚過我的好多，我都知我冇天份喇。。。出爐即食真係幾好味呢。自己搓麫包都幾好玩，但冇一個「發酵機」的話，好似難咗少少。

簡易香蕉muffin

呢排得閒就會整香蕉muffin，實在太容易了，我記性咁差我依家都唔駛睇食譜就整到，十五分鐘內就可以入爐！仲係銷爛蕉的最好方法呢。

(Recipe from Nigella Express)




1. 將250g麵粉（我用中筋）、80g糖、半茶匙baking soda、一茶匙baking power拌勻。
2. 將兩隻蛋加125g菜油拌勻。
3. 將（２）加入（１）。
4. 壓爛三條蕉，加入（３），鐘意的話可以加朱古力粒。
5. 入預熱180度焗爐，焗大約２０分鐘至金黃即可（請自行睇火）。

試做Nigella Lawson dense chocolate loaf ❤

咁弱的風都打得成，真係有點大跌眼鏡！確認咗起碼朝早唔駛返工後，食埋早餐就啦啦臨動手開爐整餅。本身唔係諗住整呢款，但又想清清積存的材料，所以就整咗Nigella Lawson的dense chocolate loaf。

通常買食譜都會响書店左揭右揭先決定買唔買，呢本How to be a Domestic Goddess Pageone都唔多覺有，但書名又好吸引，唯有睇Amazon的reviews，好壞都有，評價都幾極端；like的人就話啲製成品好正好味，dislike的人就話啲recipes唔work，muffin硬如ping pong ball，睇到都覺危危地。但終究好評多過劣評，我姑且一搏，第一炮試整呢個chocolate loaf。

一睇recipe，要落水？？？！仲要落250ml，都唔少。半信伴疑之下照跟（我只係落咗200ml多啲）。。。效果好好啊！！令蛋糕帶少許濕潤，同brownies比又係另一種口感。又係簡單易整的cake～～～下次整邊款好呢？






黑姑甩突的蛋糕，點影都唔靚，但好味就得啦！




做法：
1. 將120g（Nigella寫100g，我有120g淨，用晒佢）朱古力隔水煮融。
2. 225g牛油同120g黑糖（Nigella寫375g，甜死！！！）cream together，再加兩隻蛋，拌勻。 (Nigella's recipe 有話加vanilla extract，但我冇加）
3. 將｛1｝加入｛2｝，拌勻。
4. 200g中筋麵粉同1 teaspoon梳打粉拌勻(a)，同滾水(b)，(a) & (b)逐匙加入｛3｝，拌勻。
5. 入爐。190度焗30分鐘，之後用170度焗多15分鐘。（請自行睇火）

斑蘭蛋糕

呢排個個weekend都焗餅乜滯，多到都來唔切blog，但最開心都係整咗呢個斑蘭蛋糕！大家去新加坡玩都會帶返幾個返香港做手信，但唔講唔知，原來斑蘭蛋糕係源自印尼架喎。。。而我媽媽就响一位印尼媽媽手中得到斑蘭蛋糕的食譜，一啲都唔難整呢，我只係第一次造，效果已經好好，非常鬆軟美味，但稍嫌斑蘭香味不足，下次要落多啲斑蘭葉先。

仲要研究吓點解個頂會焗到裂開少少。。。冇裂的話有信心拎去賣㗎！





唔知嚟緊星期中係咪真係會打風，呢啲唔到我控制，但我己經諗緊打風的話要焗乜。。。冇得出街，烘焙都係個好節目呢！

Cookbook Craze

雖然冇去書展，但坐响屋企都可以買到好多。。。或者更多的書。




我冇選擇困難症，真係本本都想要～～
呢度本本都參考書咁厚，閒閒地夠我煮十年八年。我真係唔好再買cookbook了。




（陳某話：聽住先啦。。。😓）

Carrot Muffin｛連食譜｝

發夢都冇諗過我會整carrot muffin，兩樣嘢（carrot || muffin）真係有點大鑬扯唔埋。抱著半信半疑的心態下，加上媽媽落order話想食，即管試整啦。。。出乎意料的好味！內裡質感非常的輕盈鬆軟，面層又脆，簡簡單單但非常美味！！一出爐我忍唔住食咗兩件。比之前的blueberry muffin好味好多（味道OK但冇咁鬆），我都係keep住整呢個喇。





做法：
1. 180g紅蘿蔔切至細碎，備用。
2. ３隻蛋加120g菜油（我用olive oil），拌勻。
3. 加入120g黑糖，拌勻。
4. 加入200g中筋麪粉、1 tsp baking powder，拌勻。
5. 最後加入1，輕輕拌勻。
6. 入爐180度焗25分鐘至熟。（每個焗爐不同，請自行調校）

自家製極濃brownies

剛過去的長假期，我整咗brownies，因為我用55%朱古力同少糖的關係，整出嚟係香濃的dark choc味，大家食完都大讚，好有成功感，又易整呢～～～ 雪過夜一晚仲好食，雖然早餐食brownie充滿罪惡感。

依家已經心思思諗緊嚟緊weekend好唔好再整呢。。。但我呢排肥咗喎（但陳生要增肥喎）。都係下個月先整啦，食得太多冇感覺喇。





做法：
１. 朱古力同牛油隔水座融。
２. 蛋同糖拌勻。
３. 將篩過的麪粉、可可粉同少少盬加入２，拌勻。
４. 將１加入３，拌勻。就可以放入焗盤喇。
５. 焗至面脆，內裡仲有少少濕就可以，大約半小時（請自行睇火）。

弁当生活 :: 第一擊

返咗咁耐工都冇諗過帶飯返工。第一：唔鐘意隔夜飯餸；第二：唔鐘意微波爐翻熱食物；第三：懶得帶飯盒，公司附近總可以解決午餐掛。

但响呢頭返咗兩年多，餐廳選擇真係好少，四十幾圓一餐的都係食得頽，冇約人都係食大家樂，做咗大家樂常客無幾耐，開始頂唔順，令我認真諗諗帶飯的可能。依家唔帶飯的第三個原因己被推翻，接落來就諗諗點解決原因一同二。

經過一輪research，開始研究日本人的弁当，原來佢地的弁当係室溫食，唔會翻熱喎，啱晒我口胃。日本人又唔會將弁当擺响雪櫃，就算天氣熱，佢地有便當用的防菌膠膜，含wasabi等消毒成份（！！），放响食物面頭就可以有助防止細菌滋生，香港當然唔覺有得賣。但好好彩俾我搵到一個叫Gel Cool的日本品牌，佢的飯盒蓋有內置ice pack，咁唔駛放入雪櫃雪到凍冰冰，但又可以keep住食物cool唔變壞，個外型仲要幾靚吓，我本身都諗住買個好靚的日本飯盒提升自己的帶飯同食飯盒意慾，真係啱晒！！！


快快手place order，跟手訂多幾件便當accessories。非常efficient的服務，我只係揀普通air mail，一星期後就收到呢個日本寄來的包裹，好開心～～～～



包裹內容：
Gel Cool飯盒
蛋模（city'super都有得賣）
飯團模
silicone cup（見啲靚靚日式便當都有用呢啲架）



星期五收貨，我仲有個weekend諗諗可以整咩食。响等待包裹時，趁書店減價買咗呢本MASAの楽楽弁当，仲有参考吓之前買落的日本人妻食譜：




第一星期的便當生活，開始！


人生第一個弁当：自煮的三色豆雞球



冇餸唔知煮乜好。。。就咁hard boiled egg加少少木耳，有啲九唔搭八，唯有靠兔仔蛋搭救。



本來呢日唔諗住帶飯，但之前一晚返娘家食飯有好多飯餸淨，有得帶走。炒蛋呢啲乾身餸隔夜都可以，豆卜就太濃味又有汁，唔隔夜會好啲。。。



第一個星期帶咗三日飯，都不錯啦！但帶飯對我來講最困難係買一個人的餸，真係冇可能。買得多隔多日食菜同肉都不太新鮮，呢個真係要諗諗。

陳生慶生 :: 煮少少

因為陳生臨近exam，唔想出咁多街，生日當日去完黑暗中對話就啦啦臨返屋企閉關溫書，生日大餐自己煮簡簡單單就算。

staub蜂巢鍋特登留來陳生生日剪彩～煮咗摩洛哥風味couscous，落咗雞肉、chickpeas、洋䓤等等。



再嚟甜品，好味又簡單的apple crumble，又係剝皮砌粒用咗好多時間，有冇工具可代勞呢？？？



呢排肥咗好多。。。就用自家製blueberry muffin代替街買蛋糕吧。blueberry多到爆出嚟。大家都話好食但可以甜啲。下次要落多啲糖！



陳生慶生就講到呢度，下次都要blog返巴黎遊記，希望六月旅行前可以blog晒上次的旅程啦。

lunchtime sogo 速行｛連本週靚粥｝

我唔係住銅鑼灣，又唔係銅鑼灣返工，但收到情報，好想買的Staub 29cm oval做緊promotion，所以lunchtime都專誠去sogo一趟。隻29cm Oval仲要連埋我冇但又想想地要的蜂巢煎炒鍋做一set，冒住俾陳生話的風險，都要帶佢地返屋企。

收貨了！29cm oval揀咗好有層次感的灰色；24cm sautee pan就係一直想買的茄子aubergine色，好完美的配搭！連埋已有的20cm round，呢個組合都夠晒用，可以暫時收手了。呢set嘢其實仲有兩隻Staub大碗送，但我地屋企太多碗，就唔開住喇。



已經plan好，過幾日用29 oval煲湯；5月中就用24 sautee pan煮陳生的生日大餐，好期待呀～～～


同場加映孖人牌砧板，之前同陳生行街時見佢望住塊板雙眼發光，我就搵咗個機會帶埋佢返屋企（我真係個體貼太太啊）。仔細望佢的點點竹紋，真係越睇越鐘意。




今個weekend跟咗本養生書煲淮山蕃茄瘦肉粥，話適合春天食用。呢個配搭好似好風馬牛不相及，但煲出嚟好好味呀！！！！！！大力推介～～～～

客串 :: 煮飯婆一週

返咗咁耐工，好似第一次自製留港的長假！之前每次請假都是外遊，今次終於試到留港放長假的滋味。我並沒有令自己失望，除了好好hea，趁閒日行街（永安、city'super），過過全職師奶生活，我也下了幾次廚，煮的都是簡單菜式，但都感覺不錯啦，終於有點當主婦的味道。

紅蘿蔔豬肉粥：買咗Staub後，我學識煲粥喇！之前真係一次都冇煲過，買了煲後煑粥的頻率激增。我地經常出街吃，有機會當然要吃清淡點，清清腸胃。我之前還買了本「養身書」，入面的粥食譜真是千奇百趣，當中的配搭之前諗都冇諗過，有機會一定要試煲。



Jamie Oliver教的15 minute carbonara：

跟JO的15-minute meal食譜煑的，本身係Chorizo carbonara，但我用咗奧地利芝士腸Kasekraner（係人間最美味的香腸啊），仲有JO教用low fat yoghurt代替cream整carbonara sauce，食得健康又美味。但始終驚食不太的熟蛋，所以都有加熱少少，令個sauce不太silky。



題外話，依家TLC台逢星期四晚７點播Jamie Oliver 15-Minute Meal，睇完佢的示範信心真係多啲，仲要佢一路講一路煮都不用15分鐘，如果熟手的話15分鐘上菜應該冇難度！而逢星期五晚７點半點就播Nigella's Kitchen，我响英國時都聽聞過呢位女廚神，她的食譜都好簡單，但devilish，冇JO的咁著重健康。但偶然都可以放縱一下自己。。。同埋，Nigella真係有種魅力，連我媽媽都好鐘意睇佢，我都係。。。

睇完呢兩位的節目，令我好想買樣嘢，下個月就係sogo thankful week喇呵呵呵。。。。。


亦因為放假得閒的關係，我上網搵到個好正的pancake食譜（係試咗另一個衰咗先搵到），簡單又易整，又唔駛分開打蛋白。製成品除咗個樣得之外，味道都好好，真係McDonald水準架！我諗住以後星期日都整pancake sunday brunch，咁我同陳生就唔駛出街食啦（星期一至五都日日出街食lunch，weekend真係唔多想出街「求其食」了）。



Last but not least，就係跟日本人妻邊惠玉學的馬鈴薯燉肉，又係懶人之選，切好材料加水同調味放晒入煲就搞掂。我地連飯都懶得煮，淨食餸，下次要記得落芋絲，更加飽肚呢。



再連埋上文的蛋糕，都煮咗唔少呢。已經好期待下次的煮婦週（雖然唔知係幾時）。

試做Rachel Khoo Citrus Fruit Cake - Quartre-quarts aux agrumes

復活節請咗四月頭星期的三日，自製長假！去完佛山有咩做呢？本想叫我媽媽來我家，跟她學整斑籣蛋糕。不是說笑，媽媽今年起碼做了二三十個斑籣蛋糕，經過多次的trial and error，到依家質感和味道都是無懈可擊的，依家食返新加坡Bengawan Solo出品的已覺得不好吃，不想吃（未食過香港美心的，所以沒得比較）。只可惜。。。媽媽這個星期外遊去，我的美夢泡湯了。

媽媽不在，唯有跟其他人學其他東西啦，所以今次試整了Rachel Khoo的citrus fruit cake，材料和做法都非常的簡單。
（不另外打材料list了，我在做法中highlight材料啦）


做法：
1. 先將1個橙和1個檸檬的皮磨成茸（finely grated zest)。（呢個磨咗我半小時，人都顛）
2. 將4隻蛋白和半份糖打至stiff peaks。（食譜話250g sugar，甜到喊，我估落幾多糖睇吓自己食幾甜啦）
3. 4隻蛋黄跟其餘半粉糖打至淺色及厚身（thick and pale in colour)。
4. 用另一隻碗撈勻250g plain flour、少少鹽、1 teaspoon baking powder及（1）。
5. 將（4）摺入（3），再加入250g煮溶牛油，mix well，再摺入（2）。
6. 放入已預熱至180℃焗爐，焗35 - 40分鐘。


這是Rachel的傑作：
 


我的拙作，不太差吧！！！




食後感：
1. 其實整嗰時已覺得太多牛油，下次會減份量。
2. 我怕很死甜的食物，所以我只是下了很少很少糖（共幾小匙）。但橙及檸檬茸的味很清新也夠味，太多糖反而會蓋了清新citrus味。（註：我口味很清淡的）


可以下次再挑戰這citrus fruit cake！

情人節自煮晚餐❤

趁住仲係新正頭，祝大家新年快樂 ❤ 心想事成 ❤ 身體健康 ❤ 青春常跓！

剛過去的情人節我和陳生都要返工（初五咁嘅樣。。。），但幸好之前一天還是公眾假期，讓我們有時間預備一下翌日的自煮晚餐。情人節當天五時半搭正我便飛跑回家了，八時許開始上菜～～

沙律：lettuce & cherry tomato with feta cheese in olive oil & red wine vinegar
湯：cream of tomato soup


前菜：Rachel Khoo教的Galette aux pommes de terre et poires avec Roquefort // Potato & pear galette with Roquefort
做法超簡單，薯仔切2mm薄片，面頭放上切粒梨及芝士，再放入焗爐焗大約20分鐘至薯仔脆邊，即成！
因為我地有之前食淨的block cheddar，所以冇用到roquefort，又放埋salad用淨的feta cheese
眾所周知，薯仔同芝士真係好好朋友～加埋甜甜的梨又撞出另一番味道。值得一試！



主菜：前一天專誠去three sixty買的鹿兒島和牛，西班牙黑毛豬扒
兩樣都唔駛點醃的，只要煎時落少少鹽調味就可以。
和牛入口化，好好味（但陳生話都係日本食到的更好味，鬼唔知阿媽係女人，但又禁制人去日本！！！！）
本身黑毛豬不用全熟，但我家的陳大廚是個安全至上的人，煮至剛熟的豬。。。外少少脆內嫩，點點的脂肪令肉味更香但又不肥膩。
兩樣都很美味～～幸好幾百元一塊的肉有吃得出的分別，下次可以再試呢。



吃完主菜都接近十時了，大家都已經很累，翌日還要返工，甜品唯有星期六再繼續，Rachel Khoo教的Earl Grey Souffle～～
影相時已經下塌了少許，雖然味道可以，但自己覺得不算太成功，因為入面不太乾身。。。下次再試做！




下次煮大餐要揀好日子，前後都是紅日的話時間上會較鬆動！（尤其陳大廚是個超級慢工細貨的人。。。）

【出讓】朝思暮想的Le Creuset Junior

先前提及於週年遊途中遇見但又錯過了的Le Creuset junior，令我心酸了好一陣子。可幸有朋友幫忙，我又可以擁有了～～本來我只是想要egg cup，但為免自己有後悔的空間，我還是買了breakfast set，令我很期待和陳生一起的快樂早餐時光，他用藍色我用粉紅，很低B但又很sweet，將來有小朋友的話就當是傳家之寶了。




落單的時候太興奮，買得太多，打算將以下出讓，大家有興趣可以私留給我啊。

Le Creuset Junior baking set，有一圓一方的迷你焗盤連迷你掃，超可愛～～





Cassis soup bowl ﹣ set of 2




Cassis crock




Mini heart ramekins with lid - red, pink, cassis
連陳生都覺得呢set好靚，問我係咪真係想放？？！





沒人要的話我唯有充公了！

入門煮婦 :: 買物篇

作為一個入門煮婦，除了要添置煮食用具外，另一樣不可缺少的就是食譜了，要不怎知道煮什麼，如何煮？所以我便大條道理由amazon UK訂了幾本食譜回來。話時話，香港的英文食譜真貴啊。




Little Paris Kitchen by Rachel Khoo
先前看電視都有聽過Little Paris Kitchen這節目，早前行過pageone見到同名的書便八掛揭開來看，內裡的食譜都不算複雜，而且不少都要用上焗爐，我可以好好利用新買的爐啦！youtube也有不少little paris kitchen的clips，主持人rachel好靚女，完全被她標準的英式口音迷倒，但我喜歡有書在手的感覺。


15-Minute Meals by Jamie Oliver
我並不是十分太喜歡JO（因為他的口音有點鄉下佬，完全以［口］音取人），但他的節目很生動搞鬼，也很欣賞他為學童及青少年所作的貢獻。買這本食譜全因為15 Minutes，雖然自已一定不會於十五分鐘內完成，但應該都是簡單又美味吧，又是很適合我這個入門煮婦。


Mastering the Art of French Cooking Vol 1 & 2 by Julia Child
早前買了staub後便上網找cast iron食譜，沿途有不少julia child的食譜彈了出來，我便八掛search下JC何方神聖。見amazon很多人都給她的食譜五星（有一位甚至是買第二套，因為之前買的都揭到爛了），我也順便買下啦。


這些食譜應夠我煮好幾年吧。我會努力的～～～


✻ ✻ 關於amazon UK的題外話 ✻ ✻
很多年前已開始從amazon UK買這買那，好處當然是足不出戶，按幾個鍵，就什麼都買到，寄到府上。當時我人在英國，還要免運費。很多我在書店找不到的，amazon都肯定有。而且，收包裹有種莫名其妙的快感。。。現在返回香港，當然少上amazon購物，但有些英文書，尤其hardcover / 貴書，amazon連寄香港的運費還要便宜，想要某東西時也可以多個選擇。

最近更發現amazon貨品的價錢很浮動，同一件物品昨天標價£17，今天可以是£10，或者£42變£32，當然也有變貴的可能。不是急用的話，可以看多一陣子才checkout。