回顧。展望

話咁快又一年了，又係時候做呢個「回顧＋展望」的動作，只希望明年又過得比今年好，一年比一年進步！

2012大事回顧
⦿ 搬屋：今次係咁大個人第一次真真正正咁搬屋，即係要執晒全屋的嘢，有架貨車來車走啲箱咁。同娘家更接近啊～
⦿ 週年遊：未試過旅程咁唔順利，由未出發已經衰咗，一直衰到旅程最後一日都鑊鑊新鮮鑊鑊金
⦿ 重捨返閱讀習慣：今年終於都睇返多啲書，但書櫃的書長睇長有，我又買到停唔到。。。去完旅行又懶起來冇睇過書了。
⦿ 自己主理聖誕大餐（感謝陳生幫手砌菜）：應該係第一次自己煮咁多味餸，其實事先砌好晒啲食材己經幫咗好多，我煮的菜式又係小兒科。其實本來我打算做個十指不沾楊春水的太太，但買咗咁多架生，好明顯我已經走咗去另一個極端了。

得咁多？真係諗極都冇喇喎。no news is good news都唔係一件壞事，平淡是福。。

十二月買不停手 :: 續集

十二月最後一個weekend都係買到停唔到啊。

首先响sogo買咗呢兩樣廚房用品：


cuisinart出品的焗爐同（多功能？！）手提攪拌器。一直好想煮南瓜忌廉湯的我冇籍口唔煮了。
明明同一位售貨員，我上次去佢就sell Bosch的攪拌器，今次又大力推介cuisinart，望落cuisinart的捧又真係短啲易操控，就呢部啦！


再行埋一直覺得師奶先會行的工展會（吃驚）。去咗孖人牌攤位買咗Staub焗盤俾焗爐，陳生見到套孖人牌餐具又雙眼發光帶埋返屋企（邊個話唔好買咁多無謂嘢啊？？明明就有好多刀叉匙！），其實手工同手感又真係不俗。再買咗啲無聊師奶嘢。可惜落大雨，都冇乜心機行，去完target攤位後都急急腳走了。




睇嚟陳生明年都幾有口福喎！


✾同場加映✾話說我昨日早上十一時多响sogo地下衝咗入𨋢，後面有位聲線好似楊奷嬅的女人响度講啲好無聊的嘢（七樓係廚具部，X樓係XX部 etc.... 咁我地出7樓啦）。我第一個諗法：又會有人把聲咁似楊奷嬅，唔知佢的朋友覺唔覺佢把聲似楊奷嬅呢。第二個諗法：呢個人講啲嘢都好無聊喎。去到7樓佢同親友出咗𨋢，見到紫紅色頭同紫色褸，OMG真係楊奷嬅啊，仲有丁生同RMB。我身為過氣fans都忍唔住吊咗佢尾一陣，佢响7樓都逗留咗好耐，原來佢都喜愛下廚，睇唔出呢！

Gossip Girl的啟示

雖然我不再是十八廿二，雖然我很不喜歡美國，但我竟然幾喜歡gossip girl，係我第二套由season 1第一集睇到去最終回的美國劇集（第一套係sex and the city，嗰時我就真係十八廿二睇埋啲中女劇，時空交錯？？！！）。

一開始被Blake Lively的笑容吸引（好甜美啊），睇睇吓都覺得Leighton Meester也很漂亮，golden boy名符其實真係golden boy。每集女主角們的styling總令人目不暇給，就連配樂都很出色。起初樣衰的Chuck都越睇越型（加上behind the scene的迷人英國腔 @.@）。不合情理或過份兒戲的劇情總會有，去到呢啲部份唯有得啖笑，一笑置至。






來到大結局，gossip girl終於現身！其實成套劇一路睇時都冇乜理過邊個係GG，一直以為有冇GG呢個人都不太重要。但原來去到最後，故事的核心都離不開權力同階級的爭鬥。原來，呼風喚雨，一隻手指就捽得死大家的GG就係平時被大家看低，最不顯眼的D。為這謎底拍手叫好！好警世啊。nobody出身，如何成為somebody？都係老生常談的，默默的努力、付出，不自誇不張狂，還要忍耐。一啲平時自以為好強，講就講到自己天花龍鳯的（呢啲人到底係自大定自悲呢）極其量都只係華麗空殼一個。而外表平凡不起眼，內裡暗藏強大實力的先係真正的人上人。講到底，直正有實力的話都無需同其他人講自己幾勁幾犀利吧。

明知故事純屬虛構，但睇完這very happy ending後心情都相當愉快呢。

平安夜的不速之客

平安夜當日公司只辦公半天（太好了）。下午返到家開始準備當晚的平安夜大餐時，有位不速之客打來，話想今晚join我同陳生一齊食飯。我不以為意以為呢位「客人」講笑，就叫佢預今晚七點幾開飯啦。到了六點幾我準備得如火如荼時呢位「客人」再次打嚟confirm晚飯時間！吃一驚！起初真係有啲難接受，一心諗住二人世界的嘛。但諗諗吓又冇所謂啦，都係加雙筷。陳生七點半放工返到就開始我地的三人平安夜大餐了。

我的廚藝只係低B班，見笑了。感謝陳生前一天幫我做咗啲準備功夫等我好快就可以搞掂～～


湯：雜菜湯
前菜：瑞士汁雞翼
主菜：肉醬意粉
甜品：朱古力蛋糕






仲有「客人」帶來的超甜多汁消滯西柚同清潤雪梨，我準備的提子都第二日先食了。當然唔少得的就係飯後花茶，飲完好好瞓架！


講咗咁耐，呢位客人就係。。。。。*drum roll* 我媽媽了。今次係媽媽第一次食我煮的食物！希望佢覺得還可以啦。


同場加映：聖誕特別版espresso




今年的聖誕特別開心啊。

週年遊 :: 情迷維也納

維也納是最好的，今次的週年之旅一離開維也納就變得越來越差了。本來今次行程想將維也納放於尾站，奈何佢的christmas market係最早開，同一時間去其他國家就行唔到christmas market啊。下次再歐遊點都要將維也納放於尾站！

雖然我地已經連續兩年到維也納，但其實我地仲有好多景點都未去過。今年除咗舊地重遊，都有去吓新地方見識一番。


Museum Quarter，很funky的燈光效果。




舊年我地冇去的Palace Schönbrunn（wow, apple keyboard打呢啲英文符號字好方便喔），連接住很大的公園同動物園。公園部份係免費開放的，我地嗰日去都見到不少人响嗰度跑步，走時上地鐵都見到好多人跑步look。不愧為the world's most liveable city，跑步的地方都咁廣闊，綠化又做得好，雖然係首都但空氣都好清新。如果我响維也納住都想個個weekend去跑步啊。



我地都做咗少少運動行咗上山岥。山岥一啲都唔高，但已經俯覧維也納了。講真，夜景的話香港真係數一數二靚，但維也納見到的話俾我知呢個地方真係好好住。冇高樓大廈，冇五光十色車水馬龍，居民的生活平靜但快樂，五點鐘放工趕在超市關門前就買好餸返家煮飯。飯後睇吓電視吹吓水可能只係十點幾度就可以瞓了（横掂都冇乜嘢做）。早睡早起精神好。



想去shopping的話，星期六吧。我地亦去咗上次冇去的shopping street Mariahilfestraße，貴為shopping熱點都唔會人迫人，但大多數舖頭六點半都已關門，店員都有朋友有家人的，冇人可以剝削他們週末同親朋歡聚的權利。未行完街的話，星期一請早！



入到百貨公司，起碼幾百款咖啡機任君選擇。响呢度咖啡機唔係咩高消費品，而係一件好似水煲咁平常的生活用品。只係Nespresso的款已經比香港多好多了。去到nespresso boutique，每十秒就會見到一個人拿住一大袋咖啡capsule行出來，好誇張！



我地响維也納度過咗一個星期日。起初有點擔心，歐洲的星期日係死城（我之前响London星期日都唔會出街的），而我只係安排咗朝早去Hofburg聽Vienna Boys Choir，之後會唔會發毛呢？？？

今次聽到Vienna Boys Choir真係好開心，上年我地响維也納時撞唔正佢的地表演時間，今次又因為改機票的關係差少少又要錯過了。表演於Hofburg其中一教堂進行，九點要就坐。我地八點五十五分時仲响度迷緊路唔識去嗰教堂，好彩最後都趕到。



聽完choir後，好悠閑地去咗cafe坐，坐完又去食lunch，之後响St Stephen's Church附近的街道行吓，雖然漫無目的唔知想去邊，但感覺很寫意，有時真係要take your time and slow down，欣賞吓好風光，refresh一下身心。所以去旅行真係有therapeutic effect～～～




營造聖誕氣氛，唔駛大堆頭，其實簡簡單單就已經可以好美。太浮誇就只會落得一個字﹣﹣俗



除咗市政廳Rathaus的x'mas market係必去之外，我地都問咗apartment主人有咩推介，去咗另一個叫Spittelberg的x'mas market。Rathaus係一個大廣場而Spittelberg係一條小街，氣氛感覺都好唔同。奈何我响Spittelberg的相都影得好差，有好多嘢真係要用自身的感觀去感受一番。


一年後又重遊Rathaus x'mas market，感覺依然好，臨走前的早上仲特登嚟多次，响冇乜人的情況下每間舖都仔細望望，有點後悔冇買多啲聖誕手信，因為巴黎的x'mas market相比下真係爭咗啲，賣遊客紀念品多過traditional x'mas goods。







如果有棵巨型聖誕樹就好喇～～～




呢檔係我最最最愛。太美了，有棵大聖誕樹的話，自己一個都要嚟返呢度買吊飾！




小朋友見到呢個巨型糖果屋真係會開心到顛。
祝大家有個平安喜樂的聖誕節！

末日前為瘋狂檢討

據說，天蝎座的人性格都是強烈的，不知道是否所有的天蝎座都是如此，但至少從性格成形開始，我對喜歡的事物，都有強烈的佔有慾望，係自己能力範圍內都想將佢完完全全地擁有。不如就趁末日來臨前，回顧一下以往的瘋狂事跡，好的可以保持，壞的就戒甩佢吧。

（阿嫂話過，世界末日就好似「小偷來襲」<< 呢句嘢充滿智慧，係唔會有人知道何年何日的）


1. MAC & Bourjois eye shadow & blush
當時我只係一個中六學生，學校附近有間新新地的商場叫又一城，入面有間MAC，有一日神推鬼㧬入咗呢間舖，自此就成日入去，不明所以地買一個中六學生不太需要的blush 同 eye shadow。同期我又無啦啦愛上Bourjois，當時香港仲未有，特登叫英國的朋友幫買的。仲有就係花花mary quant，兩盒夾埋有八色眼影，又係啲騎呢色。其實到依家我都唔算成日化妝（一個月最多一至半次度）。

原來我都丟咗好多喎，一粒MAC眼影都冇留底＠＠ 呢啲留低用嚟警剔自己唔好瘋狂買啲自己唔多用得著的東西。


2. Peanuts 花生漫畫
又係中六的時候開始（係咪form 5時會考讀書讀到儍咗中六咁瘋狂買物？？！！），無啦啦沉迷花生漫畫，响pageone見到的都買了，再加上之後去英國都時不時上amazon睇有冇新書出， 我估嗰幾年的peanuts漫書我都買得七七八八。唔好睇佢係漫畫，佢絕對唔係俾小朋友睇的（小朋友睇咗都不太明當中想講啲乜），反而睇睇吓會有種好酸甚至點點苦的感覺，當時的我半隻腳踏入成人世界，開始對所謂「世界」有點體會。。。花生漫畫當中有某些場景係重覆的，例如Lucy每年都揸個美式足球俾Charlie Brown踢，但每一年Charlie Brown都係落空踢唔到（如是者就廿幾年了？？！！）。但自己當時感受最深就係Sally Brown對Linus的「愛」，Linus永遠唔會明白同接受的愛。。。。好多嘢無論你如何努力付出幾多你都係永遠得不到。現實就是這樣殘酷。



其中一本買重覆咗添！！失心瘋～～～



3. 森林家族
呢個唔記得係form 5定form 6開始沉迷了，總之就係非常非常喜歡。儲儲吓，我已有一間大屋連全屋傢俬、細屋連全屋傢俬、一間餐廳連傢俬同餐廳制服，在加兔仔一家七口咁啦。嗰時真係好好好鐘意架，佢的配件的確又係非常精美。我仲好想要佢間綠屋頂大大屋添，係我的dream house，仲記得當時間大大屋sogo賣成七百幾鈫，對我嚟講係個天文數字。當然我最尾都冇買到啦。。。有一次，我幫隻兔仔換㕑師衫時，見到可愛的兔頭連住一個人形的身，我即刻覺得好恐怖好詭異，從此我就一件都冇買過了。但最激氣係我媽媽幫我剪爛晒啲盒（留起個內容的圖，話啲盒冇位放喎！！！！），我想賣返出去都唔得，唉。

我的物業包括：





終極dream house：




4. 金田一少年事件薄
小學時已經開始睇了，當時高中二年級的金田一對我嚟講係個「大哥哥」，原來係個大唔到的哥哥，今時今日我已經大過佢好多了，真搞笑。話說之前本漫畫出版時我都唔响香港住，總之就唔齊腳。結果有一年漫畫節我補購返所有我冇的，補購完嗰刻係齊腳的，但之後我又離開咗香港，啲漫畫又唔知俾屋企人收咗去邊，希望有朝一日可以一家團聚啦，我已經冇咗再要儲齊一套的衝勁喇。當然，依家我人在香港，响街見到都一定會買的。





5. 明信片
去旅遊時一定會毫不留情地買喜歡的明信片，有時入到啲art gallery都會買明信片。但最開心都係叫人寄postcard俾我，收收埋埋竟然收到咁多（相片中的只是一小部份），真係十分十分感激每位寄我postcard的朋友，有機會搬大屋一定會展示出嚟。




6. 去日本．買遮
要注意，買遮呢個動作一定係响日本發生架喎。我响香港都冇買過遮。但最吊詭的係，我根本唔喜歡擔遮，除非倒水咁落唔擔會濕晒身啦。咁點解我咁鐘意响日本買遮呢？自己都解釋唔到。但好肯定的係，當日本（被陳生）解禁後，我一定會再去買啲遮嚟。




7. 日文工具書＋關於日本的書
呢個中的毒好深啊。。。旅遊日語都買咗兩本，仲有一套書係重覆的，因為我嫌買咗的嗰套排版同顏色唔吸引，買咗另一套內容一模一樣但入面靚啲的。事實係我兩套書都冇乜掂過。。。





8. 襪褲類
不明所以地瘋狂喜歡買襪褲 / leggings之類的。主要係去日本時同淘宝，冇人比日本人更沉迷襪褲類喇，專賣襪的店都咁鬼多。日本入咗blacklist後唯有淘宝了。而家淘宝入面仲save咗好多對待買。。。幾時先買夠呢？




9. 綾賴遙封面
雖然我都係女生但我覺得綾賴遙非常可愛啊～～～有佢做封面的雜誌我都會買都捨不得丟，雖然唔會再翻睇但真係當係寶架嘻嘻。。。





要數總可以一直數落去，但都差不多。如果星期五不是世界末日的話，我希望自己唔好再買埋無無謂謂的東西，希望自己沉迷做個好太太煮多啲好嘢俾陳生（只限冬天），夏天沉迷做家務當係運動啦～～

十二月買不停手

年尾係人所共知的購物季節，我地自週年旅遊開始，就瘋狂倒水喇！

返到香港第一敗：iMac
我恨買iMac恨咗好耐好耐了，幾年前好random地買咗部macbook，其實回想起嚟有啲後悔，因為我都唔帶電腦出街，依家有咗iPad又唔興帶notebook去旅行喇，仲要macbook貴過iMac，spec又冇咁好。。。。。總之就係買錯。過咗幾年又差不多係時候換下新電腦，陳生又話要搬咗屋先可以換喎。。到搬咗屋，又諗住等埋新model出，望穿秋水，過完一關又一關，到見到網上有得賣，好難唔即刻order。

12月1日落order，剛剛星期二收貨，即刻開新舊電腦的migration assistant過data，過程又係煩。。到星期五先順利過舊電腦setting + data transfer去新電腦。我對上一部desktop，其實都係我中學時的第一部電腦，而家用返desktop，有settle down的感覺，好微妙。



mac就係mac，唔係第一部都冇太大感覺，但最特別的係用magic trackpad，可以輕易咁用左手控制，變咗可以左手一路用電腦右手寫嘢，順便訓練埋右腦添！仲有speaker聲靚過macbook好多啦～～


第二敗：Le Creuset
Le Creuset啲色靚到暈，勁吸引，點解我會買Staub呢？除咗因為喜歡佢的手感手工detail外，另一最主要原因就係，我不能去開倉的，我非常𢣷怕人多擠迫的地方，响知道開倉會平好多的大前題下，完全俾唔到理由自己平時响shop / counter用貴頗多的價錢買。但，呢期有x'mas promotion 30% off all items，我忍唔住去𥄫𥄫了。煲就點都唔會買，但㕑房餐桌小物都很吸引。結果買咗大花花碟（媽媽買給我的康寧真係質地靚好好用，但全白色冇花紋的大細碗碟，冇乜fun，有花花點綴吓餐枱好啊）、粉紅ramekin（買咗見到的最後一set粉紅）、仲有spatula set，唔知買嚟做乜？？！！！



見到一枱粉紅色，好難把持得住。。


再順手買咗幾份聖誕禮物，送禮又有自用又有送俾陳生又有。其實shopping list仲有想買的東西，心大心細，或者我下個weekend留在家煮吓飯好了。