河內假期 :: 總結

last but not at least, 一定要講講我地住的酒店，因為令我地的旅程加咗不少分！
開始plan行程時就俾我見到呢間响Tripadvisor排頭位的Hotel Elegance Hanoi Diamond，見全部人都一致好評（！！！），即刻訂房。




去到真係沒有失望。首先，就係超豐富美味的buffet breakfast。除咗buffet table的食物外，仲有得揀唔少即煮食物，如粥、pancake、omelette、越南pho。。。等等。朝朝都食到好飽好滿足。




除咗早餐外，其實我地差不多晚晚都响酒店食晚飯。佢的菜式又係一流～～～好好味！！同香港食到的越南食物完全兩回事，真係唔係好識形容。





再來就係職員，真係非常友善。可能我地成日响間餐廳出現啦（一日兩次，我地住咗四晚），啲職員都認得我地，都好鐘意同我地傾計。睇得出佢地都好享受自己的工作啊。


我地呢次揀的酒店仲有自家spa，响香港做嘢做到咁攰，鬆吓就啱喇！



去完呢次河內之旅，都好想等天氣涼啲的時候再訪，起碼可以行多啲街去多啲地方。但去越南唯一的大障礙就係簽証，要搞簽証真係好煩（因為我一定唔會搞visa on arrival，响機場等到儍），又貴。或者有平機票時可以諗諗。。。



blog完河內之旅就可以blog吓台北快遊，a short but sweet trip~~~

一試難忘 :: 越式drip coffee

唔講唔知，原來越南係世界第二的咖啡出口國！去到越南，少不免要試試她的咖啡。人生第一杯的越南drip coffee係响入住的酒店飲的。嗰種香、醇、帶回甘的咖啡香加上煉奶的甜，係nespresso無法媲美的另一種美味。真係想將這味道帶返香港！响酒店職員介紹下，我地就去咗一間cafe，但實質係賣咖啡豆的小店。店員非常友善，好主動邀請我地試飲，連最貴的貓屎、藍山咖啡都可試。問我地邊度人後，又爆料話有香港人一年去佢地舖幾次入貨（唔記得幾多kilo）。响咁多咖啡豆包圍之下飲咖啡真係別有一番味道。試飲咗幾款，當然唔會空手而回。係咁易買咗少少blue mountain 同traditional（即是越南咖啡豆）。


再响街邊買埋滴漏裝置，自家製越南咖啡話咁易！



首先，杯內加煉奶。磨咖啡豆，不太幼又不太粗。磨好的咖啡粉放入滴漏裝置，加少少熱水，等咖啡粉脹少少。然後沖入滾水，等佢慢慢滴。


強烈建議用透明杯，因為淨等佢滴完同睇住佢滴係兩回事；睇住佢滴有嗰種take your mind off things｛暫時｝放下一切忙裡偷閒的感覺。

等一陣就飲得。


但唔好飲咁多，夜晚會失眠啊！

河內假期 :: 污點與亮點

先苦後甜，講咗污點先。同巴黎之旅相比其實都唔算好污點，但有啲唔開心，點解我地同法國餐咁冇緣份？

我地鎖定咗响Metropole Sofitel Hanoi Le Beaulieu食我地的法國大餐。五星酒店應該不錯啦（食物同服務）？我首先e-mail酒店，問佢攞餐牌睇吓，再問佢午餐或晚餐駛唔駛book枱。然後，我就book咗行程最後一日的中午。去到餐廳，坐低，點解得drinks menu呢？原來呢間餐廳只係晚餐先有法國菜，中午係食自助餐！！！！有冇搞錯呀！！！！第一，响我收到的menu或e-mail完全冇寫法國菜只限晚上供應；第二，佢e-mail有提及酒店其他餐廳的自助餐同high tea，點解又唔講埋我查詢的餐廳中午係食自助餐？？？？第三，呢日係旅程final day，想轉其他日子都唔得啦！！！


結果我地去咗酒店另一間餐廳食lunch，好（法式）悠閒但始終有點鬱悶。



其實間酒店好靚好有古典美，响出面同入面都很有法國風情，彷如置身巴黎。。。（我好討厭巴黎的壞人，但不得不認同巴黎真係好靚）




亮點就係：學煮越南街頭小食！去咗酒店介紹的Hanoi Cooking Centre，我地好準時就到達，首先坐低飲杯越南涼茶。之後就出發，行街市！原來我地包堂，so happy~~~~

首先去咗街舖，教我地揀靚魚露。



再嚟就進入街市的核心地帶了！呢檔賣米製品，如滑滑河粉、春卷皮。



豬耳成日食，但成塊豬耳真係未見過。



各式各樣的新鮮食材，相信對西方遊客一定好震撼。
有雞蛋、鴨蛋、仲有鵝蛋。好大隻啊！導師仲買咗隻鴨蛋連未鴨仔，返到課室俾陳某食。



越南菜式好多用上香草，呢檔就有不同種類，連香蕉花都有唔知係咩味呢？



返到課室，即刻示範第一道經典越南食物：湯牛河。正宗的湯牛河要煮8小時，一般家庭都係朝早煮、夜晚食，又或者係夜晚煮，第二朝食。我地呢次食到的就係真真正正煮咗成晚的湯頭。湯的味道。。。固然非常好，很鮮很濃，仲有很重的香料味，所有材料都很入味，好喜歡！呢種味道香港暫時未食過。原來，佢地會直接將蔥頭同薑放响火爐度燒，話將啲香氣迫出嚟喎。



食完碗美味牛河（其實剛响酒食完豐富的早餐，仲好飽，呢碗牛河真係有少少不合時），就到我地落手落腳煮了！先整dipping sauce，老師教我地雕花。呢啲咁難的，留返俾陳某吧，我都係搞拌一下就好了。



再來刨絲，整越式沙律。



包春卷，我第一次包，好好玩啊。



整甜品，香蕉糖水。先煮融糖，加水同椰槳，再落香蕉煮一煮。



最後就炸西湖蝦餅。蕃薯刨絲，加蛋槳，放响特製ladle內（型狀較一般湯殼扁），再加隻蝦响面頭，炸至金黃。


炸到咁下上，切半繼續炸。

企咗成朝，終於大功告成，可以上樓上餐廳享用我們的製成品了！企咗咁耐，真係有啲攰。導師大肚六個月，都係冇坐，體力超好～～

餐廳的環境好唔錯，最重要係，有強勁冷氣放送。要知道，出面的氣溫有４０度。而河內好多餐廳／cafe的冷氣好弱的。。。

先叫杯飲品濕吓口。河內啤酒同青檸汁。。。個青檸汁太太太好飲，我前後叫咗三杆。（汗）



上菜～～～唔講唔知自己整吧！
沙律：簡單易整，只要醬汁調配得宜，好難出錯。開胃好食啊！
春卷：配料好重要，平時唔食芫茜的我，好appreciate佢的帶出的香氣，真係畫龍點睛，令呢道菜生色不少。
炸蝦餅：平時我唔食炸物的。。。但呢個真係好特色，值得我破戒！！！



最後就係甜品，好香焦糖、蕉同椰汁味，很甜，對我來講係一種全新又陌生的味道，但一試難忘。食完已經住返到香港要再整喇。


呢餐的份量好大（仲要我地食咗很豐富的早餐，仲有牛河），因為唔想打包，坐咗好耐先可以食完。望著窗外都可以感覺到的強勁暑熱同猛烈太陽，餐廳內恬意地享受美食同一杯接一杯的冰涼飲品，感覺良好，非常chill～ 唔fine dine都食得好開心（安慰自己食唔到法國餐）。



雖然價錢相比越南物價係頗貴，人頭計同法國餐價錢相差無幾，但好值得呢～～～過了很快樂的一個早上！

Hanoikids Tour

上網隨手search都搵到咁多河內騙局，加上上次巴黎的不愉快事件，又驚上咗賊的士。。。我同陳生都想頭一兩日join tour，認識吓呢個城市先自己出去玩。好好彩俾我發現呢個Hanoikids Tour（但原來呢個組織的網業都有偽冒，真係要十分小心）。帶團的係河內的大學生，而且係包團的關係，行程可以自訂，想去邊都可以。最驚喜的係費用全免，只需要包領隊們的交通、入場費、飲食等就可以，因為領隊們都想透過接觸遊客學好英語，而雙方從閒談中可更了解彼此生活的地方，呢個概念不錯呢。


我地預約咗一個全日tour，一個半日tour。全日tour day 2就出團喇！約咗tour guides早上九點十五分，我地食完早餐去到酒店大堂時佢地已經等緊我地。傾好大概行程後，即刻出發！

先去Hanoi Hilton。呢度並唔係酒店，而係一所法國人為越南政治犯起的監獄，內裡的生活、迫供方法都非常不人道。




响大概五十年代，越南擺脫咗法國統治，响越戰期間，Hanoi Hilton就用來關押美國戰俘。從相片中見到啲美國戰俘响監獄的生活都頗疏肝，有得打藍球、卓球，大家都笑得好開心，聖誕新年仲會收到胡志明總統的祝福添。但實情係點，心裡有數。




睇完Hanoi Hilton都接近中午，我地就坐的士去另一景點：位於old quarter的ancient house。Ancient house顧名思義就係將越南的舊式建築呈現。內裡四四方方，中間有個庭院，有點似京城的四合院；不同的是，ancient house形狀窄及長，因為古時係根據門面的闊度征稅，所以住宅都是門面較窄，向內發展。屋內的佈置和格局都很有古代中國的味道。




睇完ancient house，就去咗間cafe坐底飲嘢。原來其中一位tour guide好喜歡成龍，覺得佢好好，又有善心（！！！）。我真係按奈不住，同佢講成龍其實唔係一個好人嚟架。佢有啲驚訝，再問我點解。點講好呢？唔想講得咁白，唯有話佢知：「香港啲人好憎佢，叫佢做蟲（People call him 'worm' in Hong Kong）！」佢聽完後，個嘴O咗，個樣好失望又唔開心😨😰。其實我係咪唔應該話佢知將佢對成龍的良好印象幻滅呢。。。再行一陣就食lunch。食物好普通，不提也罷。


食完午飯，就去咗胡志明故居公園參觀。胡志明的胡居係俾一個頗大的公園包圍。當時兩點幾，相信氣溫已經升到40度了。我用了最最最大的意志去抵受強烈的暑熱，一路行一路撥扇一路飲水，都冇乜心機睇嘢同唔係好聽到tour guide講乜（連相都影唔到（！！！），啲相係陳某揸相機的）。公園裡又有不少大陸遊客做埋啲冇公德心的事（例如：吐痰入水池），真係眼火爆！！！！！





幾經辛苦終於行完公園，頂唔順，即刻上的士返酒店，提早完成今日的行程。😅😓 滴／流晒汗咁同tour guides合照留念。add咗佢地facebook，到依家都未send返相俾佢地添。




Tour後觀感：
唔好以為Hanoikids只係陪我地搭車入場周圍行，佢地真係對啲景點好熟識，就好似專業導遊咁講解我地睇緊啲乜，一啲相關的歷史背景都講得好詳細。
要改善的地方，就係行程安排方面。本身我地去的胡志明故居公園，隔離仲有另一個胡志明有關的景點，只係早上開放。咁我也係咪應該早上就去睇呢部份而唔係下午先去呢？




另一個Hanoikids的半日團就約咗响行程第四日的早上。當日一起身就下雨了。食緊早餐時就收到信息，話Hanoikids的tour guide因天雨關係暫時來唔到，留咗電話叫我地聯絡返。食完早餐打返俾個guide，佢話佢partner落雨嚟唔到，因為佢地係揸電單車過來。我聽到呢個原因覺得好lame囉。落雨就唔出街？咁落雨啲人返唔返學，返唔返工？👹😮 當時望落街，一樣大把人揸電單車。本身個guide建議如下午停雨的話佢地可以再來，中午再聯絡我地。雨十一點幾都停了，我地十二點幾返去酒店都冇信息俾我地。被甩底，我地唯有自己出去行。。。

河內假期

當你睇到呢個標題時，我地。。。已經從河內返來了！本來，如果可以選擇的話，是想趁三四月比較涼時遊河內（河內同香港氣候相約，都有冬天）。奈何要就陳生的讀書時間表，為咗唔想佢玩得唔盡興（其實係佢打死都唔三四月去旅行），最後等到六月學期考試終結先去。




如我所料，河內六月已經好熱。响香港已經覺得太熱頂唔順的我，去到更熱的河內，簡直要了我的命！我地旅程的第二／三日，氣溫去到攝氏38至42度，頭頂可以煎雞蛋。好彩之後兩日天陰同落雨，氣溫降至25至28度，我地先不至於被迫留在酒店避暑。

去越南，最麻煩就係搞簽証。有兩種做法：一係自己去越南領事館搞visa；又或者透過agency或酒店，足不出戶申請visa letter，去到越南機場搞visa on arrival。怕麻煩的我，揀咗。。做法一！因為攞咗visa letter，仲要帶備美金、相片去到越南整落地簽証。要額外預備呢啲嘢，都會帶來壓力。尤其上網都見到有人响呢part奶嘢。去到越南機場就証明我揀啱咗，visa office一堆人响度等緊。以越南人的效率，再以我的性格，一定會等到黑面。

經過上次去巴黎的白色恐怖經歷，今次起行前花咗好多時間search越南／河內的scams！從人地的痛苦經歷吸取教訓，希望唔好再中招。好幸運，今次的行程頗順利，但小心駛得萬年船，去之前同旅途中都一定做足research，提高警覺。

越南的一個大scam就係的士，尤其係往返機場的士。如果你隨意跳上一架，佢會打你去到「你訂了的酒店」，然後就會有職員話你知間酒店full咗，再車你去另一間。聽落都覺恐怖！所以我地透過酒店幫我地安排機場接送，放心好多。

响高度警戒同沒太大期望之下，這趟旅程比預期中開心～～～

買咗少少手信，有越南咖啡豆、刨絲器、救我一命的大扇。。。


真係冇乜嘢買，連手信都不太靚，又冇乜食物可帶走，最好食的都食咗落肚。戰利品相真係削咗啲（仲有少少磁石同明信片冇上鏡，明信片仲要到依家都未搵到。。。唔知去咗邊）。