2013・14 // 回顧。展望

成個十二月忙到暈（但又唔知忙乜，打緊blog呢刻好多嘢仲未做，鳴～），仲有兩日又到新年，又係時候回顧展望，睇返舊年的展望先：

2013展望
⦿ 繼續睇多啲書啦 << 今年睇多咗，希望明年再睇多啲
⦿ 做多啲運動（呢個年年都講喇）<< 九月開始有跳鄭多燕，但十二月稍凍暫時停咗。。。
⦿ 盡量早睡早起 << 有！差不多都十一點九前瞓，放假就十點前起身，希望繼續keep住！
⦿ 好好多加利用新入手的廚房工具，提升㕑藝，提升overall主／煮婦能力！ << 同舊年比提升的空間太大了！所以2013年肯定有進步，希望keep住多煮食啦。
⦿ 如無意外希望去到兩次short trips吧。。。週年長旅遊要等好幾年後了@.@ << 真係去到兩次short trip，算係咁
⦿ 希望自制能力提升，真正有需要先買，唔好買咁多無謂嘢。<< shopping就一定有繼續但感覺上買的東西都好有用。。。我諗我有需要買一間大屋因為冇位放嘢喇。。。



2013回顧
今年各方面都平穏（感恩），最大變動就係返工方面，搵到自己的方向，就係。。。轉咗一份返三日的工！我自己真係不太喜歡「返工」（個人冇事業心，同時討厭返工指數極高，例如：逢星期六晚開始低落因為星期一要返工、隔幾日就問陳某我可唔可以唔返工／可以幾時退休等、仲要次次都加句：「唉，唔係好開心呀，我唔想返工呀。。。」，我真係有點擔心佢會唔會頂我唔順，要被訴苦三十幾年喎），但又好肯定唔返工唔得，因為太多時間好難打發，同個人會變得冇方向。。。所以依家返三日的安排實在太適合我，一方面我唔會好似以前咁討厭返工，另一方面又有相當的時間俾我做自己想做的事（睇書、興趣班、運動之類，講真如果返五日我唔會有時間跳鄭多燕）、打理屋企。。。等。有朋友問我係咪為生小朋友作呢個變動（！！！），我相信湊小朋友仲辛苦過返工！！！所以暫時都係想歎吓先， 享受吓畢業工作後好難得的半自由身狀態。


2014展望
同2013的展望差不多，希望生活得健康啲，不段充實自己，今年勝舊年。除此之外，平平安安冇穿冇爛，已經好開心了。


（某日返工忙𥚃偷閒獨自去歎咖啡）

A little history of the world by E H Gombrich

說起來真係慚愧，本來今年諗住睇多啲書，點知買嚟買去到係食譜、日文教學書等。到幾個月前諗住的起心肝睇買咗好耐的East Meets West（彭定康著），但真係。。。讀到一半真係頂唔順；其實好多年前都嘗試睇過呢本書，但當時覺得好難好heavy-going就放棄咗，到咗今時今日總算睇得明，但實在太太太悶，越睇就越唔想睇。睇吓幾時有機會再睇。。。

前排睇蘋果日報見有介紹呢本A Little History of the World，上amazon見評價好唔錯就去Pageone買啦。反正我一直都想認識多啲歷史但唔知從何著手。





我覺得呢本書真係好啱我睇。本身作者係維也納(!!!)人，佢1935年寫時係寫德文。但到90年代時，响佢家人鼓勵下，將原本的德文版翻譯做英文。因為first edition係寫俾"young readers"，所以成本書的tone都係好似聽緊爺爺講故事咁，你可以話感覺唔係好authoritative，但我覺得歷史咁complex，唔簡易啲真係好難入腦。

呢本書從石器時代講起，去到作者本身都經歷的第二次世界大戰。本身作者係歐洲人，對歐洲比較熟識（可以用六星期寫完本書！！我睇都用咗一個月），所以本書主要都係圍繞歐洲歷史，反正我都係對歐洲歷史比較有興趣。

唔睇真係唔知，其實二戰前的一兩千年歐洲都係長期處於動蕩，不停地打仗，可以生於呢個相對穏定和平的年代，真係十分感恩。而且一啲人和事並唔係想像中咁耐之前，例如，作者的爺爺原來已係經拿破崙年代的人，而作者本身亦有响維也納美泉宫見過emperor of Austria, Franz Joseph。

一直都覺得，越知得多，就越發現自己知得少，好想再搵其他歷史書睇吓，填補返啲gap，但去邊度搵本又淺白又深入的書呢。。。

題外話，本身作者係art historian，佢另一本書The Story of Art已經响我amazon shopping basket，睇吓幾時湊夠多幾本書就落扑鎚買先。

吃喝 :: 台北

呢幾日的天氣好舒服啊！但我地張羽絨被响陳某外家度，未有機會攞返，所以呢幾晚都係蓋冷氣被。起先我好擔心會唔會唔夠暖，點知第二朝起身時係非常暖！真係估唔到，人體極限可能都係咁樣試出嚟。


返入正題先：台北遊記吃喝篇。

都係嗰句，一個人真係食唔到幾多嘢，所以我連夜市都冇去，唔細的份量相信食一檔已經夠飽。


去到台北的第一餐，出發前上網見呢間cafe好似唔錯，仲要响酒店附真，啱晒！



墨西哥肉醬crossover日式溫泉蛋飯，非常好味！！！食到一滴不留。
好喜歡台灣的餐廳！一定好多菜，啱晒我呢個冇菜唔安樂的人。



仲有窗外的好風光，很寫意呢。



晚上約到香港的友人食台灣菜（？），一枱都係。價錢相宜，好味夠飽又多菜！！！



第二朝的阜杭豆漿早餐，件蛋餅飽到我唔駛食lunch。



到四點幾先肚餓，去到永康街｛不准大笑的｝Xiaomijo小米酒咖啡館食三文治，點解一份可以咁大份，太過份！呢一份絕對係香港的兩份，食完又係好飽。



仲有杯rose latte，係我見過拉得最靚的花。拉花嗰位barister，仲係一位頗帥的帥哥。。。呢。



間cafe好多別緻小物。行到腳跛，响呢度hea咗一段下午的快樂時光，香港就係冇乜呢啲悠閒的空間。




Day 3早餐，1st round反兜day 1夜晚的餐館，好好飲的茉香奶茶，濃濃的茶味。。。同香港的差太遠。



2nd round @ Cafe Melange米朗琪，昨日台灣的友人講到呢間的waffles好正咁，都不錯啦～～反而個冰咖啡就冇想像上咁好。




食完又係超級飽，就去行吓街運動一下，直至到下午坐高鐵去機場，先食個車站便當。


連飲品NT$100唔駛，素菜便當味道出呼意料的好（感覺又健康啲），半小時車程，啱啱好
成個清晒。諗起返到香港中午又要响大家樂食生粉汁飯。。。唉。




後感：
我發現，每次去完一個地方旅行我都有嚴重的反兜傾向，台北都唔例外。好多人同我講台北好悶喎。。。但在我而言，台北好多嘢食，街頭又有cafe又有，又有我鐘意但香港又冇的店家（不能開的秘密），書店的書量多質又好（我住台灣應該會買書買到破產），出到街空間感又強過香港好多（就算去到最旺的東區，人流好似都唔及晚上十一點 後的旺角咁密集）。。。唯一不太習慣的就係商場唔响捷運上蓋不特止，仲要行咁遠（e.g. 微風）。返到香港後不停留意台北的平機票，就連剛過去的生日都想走轉台北weekend getaway，但陳某話時間咁短好攰唔好玩喎，咁我冇理由生日又一個人去台北啫。希望不久的將來可以再訪！


-- 台北遊記完 --

日系精緻旅遊app / e-book by ことりっぷ

我的日本人日文老師極度熱愛旅遊，佢推介咗個*日本*旅遊書系列ことりっぷ co-trip俾我，淨係睇個網頁都已經賞心悅目（好喜歡的小甜日系風），而呢個ことりっぷ co-trip 系列對象係工作女性，自己去一個悠閑的三日兩夜的小旅行，鐘意去吓cafe、食吓甜品咁（講緊我？？）。





佢有真書同ebook，ebook就係download咗佢的app之後再買，既然屋企的書櫃係爆棚的，我的virtual bookshelf 都唔應該吉吉地掛，無聊地download咗好幾本落嚟試睇（每本開咗後可以睇十分鐘）。見到滿滿的virtual書櫃，又開心又滿足（自我淘醉）。


本來諗住download（堅買）本ebook來計劃嚟緊的旅程（人生的第一本ebook！！），但陳某叫我不如去買本真書，有本書响手開心啲喎，又可以寫吓嘢，但明明佢冇份plan行程，我又唔鐘意响書度寫嘢。（結婚週年日其中一個節目就係去日本書店訂呢本書，希望快啲收到！！）


講返本書，入面的排版非常精美，而封面仲係好靚日式的和風柄，佢的website話：「全種類違う柄なので、お部屋に並べるのもすてきです」，大約意思指每本書的和風柄都不同，排列出嚟好靚咁話，我都想書架有成層ことりっぷ 啊。內容方面，只係睇咗十分鐘，唔夠時間仔細睇，但我相信會有啲香港旅遊書冇的推介，（希望）減低响外地撞到香港人的機會。


最衰佢ebook冇香港嗰本，好有興趣知响日本人的眼中香港有咩girly又悠閒的地方呢。


前幾日响pageone見到co-trip中文版，但只有大路城市如東京、京都、大阪同沖繩，想要其他日本城市，都係要睇返日文版。

happy cotton anniversary 20.11.2013 ʕ•̬͡•ʕ•̫͡•♥

轉眼間就兩年，我成日都話開心的時間過得很快。因為陳某學業為重的關係，今年同明年的anniversary相信都會响香港渡過，雖然有少少失落冇得去維也納的christmas market，但都好開心！！

20號當日中午就出去食飯，之後不停行街、食，就快聖誕大家的購物意欲都好高漲（！），但是日重點係晚飯，去兩年前擺酒的venue明閣。

今晚的menu，一個月前book枱時已經揀好。



訂枱時要求窗口位，就係為咗呢個朗豪坊景。雖然依家好少好少去朗豪坊，真係好怕咁多自由人，但其實呢個地方對我同陳某意義重大呢。



今晚的美食：




作為豆腐魔，我最喜歡的係松露千層豆腐同甜品之一的豆腐芝麻凍布甸；豆腐加上松露的有畫龍點睛之效，而豆腐芝麻凍布甸的豆腐味好香好香，仲有我最愛的黑芝麻～ 但其實個竹笙清湯都非常讚，很鮮甜濃味，每滴都係精華。其他冇點名的都好好味，乳豬脆、龍蝦又彈牙爽口，呢餐非常滿意。


不能少的合照。



埋咗單諗住行，點知仲有surprise！係明閣俾我地的anniversary treat，炸杏片香芒卷。



what a happy and sweet ending to a wonderful day，如無意外我地明年都應該去明閣架喇。。。其實1120响香港的話都會返嚟明閣。（我地真係好悶專一架hehe....）

悠閑。買物 :: 台北

其實三日兩夜，時間咁短，真係做唔到啲乜。但好彩有台北的朋友約我去睇雷諾Renoir展覧，啱啱係展覧的最尾幾天，沒有錯過，真幸運！

由於台灣的展覧係唔俾影相的（係咪想遊人認真用肉眼觀賞呢），只可以响門口拍拍照。



再來就去咗間泰式按摩店，舒解吓疲累的身體。環境好不錯呢。



唔好講笑，呢兩日行的路真唔少，瞓得又唔夠。按完後，疲累的感覺消去七成。


由於悠閑的節目不多，搭埋少少敗物。出發前（只係短短三日），陳某已經不繼同我講「唔好買嘢，唔好買嘢，唔好買嘢」。唔通咁樣洗腦真係work？我去到台北行街時都不繼聽到呢把「唔好買嘢」的聲音，買物都買得十分刻制。見到想買的都唔敢買太多。最後都買咗少少比較有用的物件，買咗應該唔會俾人話的。

响台隆手創館Tailung Hands買的小工具：



意粉隔水器同埋。。。估唔估到青BB係乜？？
真係好想好想去Tokyu Hands，規模差得太太太遠了。。。。



仲有一袋不能開的秘密。。。幾時可以見天日呢？？？

簡易香蕉muffin

呢排得閒就會整香蕉muffin，實在太容易了，我記性咁差我依家都唔駛睇食譜就整到，十五分鐘內就可以入爐！仲係銷爛蕉的最好方法呢。

(Recipe from Nigella Express)




1. 將250g麵粉（我用中筋）、80g糖、半茶匙baking soda、一茶匙baking power拌勻。
2. 將兩隻蛋加125g菜油拌勻。
3. 將（２）加入（１）。
4. 壓爛三條蕉，加入（３），鐘意的話可以加朱古力粒。
5. 入預熱180度焗爐，焗大約２０分鐘至金黃即可（請自行睇火）。

台北單人遊 :: air + hotel

呢次的台北遊真係令人好興奮，因為從訂機票到起行只有短短三日，唔知將來有沒有機會破這紀錄。

多得facebook pages，啲旅遊資訊真係唔駛自己搵就响自己眼前。日日都見到飛邊度平，好難抗拒。。。今次訂的係長榮週末劈，飛台北的特價機票，早去晚返，雖然三日兩夜唔多夠，但留低陳某一個响香港工作自己去玩，好似唔係咁好。。。（我要克服呢個障礙）

因為只係去三日兩夜，為咗玩盡啲（為咗旅行，你可以去到幾盡？？），訂了早上七點半的班機。七點半啊！！！我之前最早都係坐星航的SQ1，早上八點的機。七點半的班次，即是我要大約六點到機場，五點前起牀。。。當然之前一晚都不會瞓得太好，三日兩夜後殘晒。。。



酒店就揀咗台北車站附近的City Inn III，位置非常好，响台北站同中山站中間度，去呢兩處都非常方便。房間亦非常企理光鮮（一個人，最驚啲離奇怪氣的房間。。。），洗手間都好乾淨。好彩咁last minute訂都仲有房呢。



地下個pantry，可以自己沖茶或即磨咖啡，正～～～
間房仲有洗衣機、雪櫃、水機、多士爐等等，有閒情日誌的話可以响度食返個早餐先出街。



仲有個好靚的洗手間，就算去到未有得check-in上房，都可以稍稍梳洗一下。


check-in時仲送咗張悠遊咭俾我，去到入錢就用得，煩少樣都好呀。




雖然book機票到出發只有短短三日時間，但呢三日內陳某已經對我進行洗腦，不停叫我唔好買嘢返嚟，唔好買嘢，唔好買嘢。今次去台北，只係拖咗個喼，旅行袋都冇帶多個。。。

河內假期 :: 總結

last but not at least, 一定要講講我地住的酒店，因為令我地的旅程加咗不少分！
開始plan行程時就俾我見到呢間响Tripadvisor排頭位的Hotel Elegance Hanoi Diamond，見全部人都一致好評（！！！），即刻訂房。




去到真係沒有失望。首先，就係超豐富美味的buffet breakfast。除咗buffet table的食物外，仲有得揀唔少即煮食物，如粥、pancake、omelette、越南pho。。。等等。朝朝都食到好飽好滿足。




除咗早餐外，其實我地差不多晚晚都响酒店食晚飯。佢的菜式又係一流～～～好好味！！同香港食到的越南食物完全兩回事，真係唔係好識形容。





再來就係職員，真係非常友善。可能我地成日响間餐廳出現啦（一日兩次，我地住咗四晚），啲職員都認得我地，都好鐘意同我地傾計。睇得出佢地都好享受自己的工作啊。


我地呢次揀的酒店仲有自家spa，响香港做嘢做到咁攰，鬆吓就啱喇！



去完呢次河內之旅，都好想等天氣涼啲的時候再訪，起碼可以行多啲街去多啲地方。但去越南唯一的大障礙就係簽証，要搞簽証真係好煩（因為我一定唔會搞visa on arrival，响機場等到儍），又貴。或者有平機票時可以諗諗。。。



blog完河內之旅就可以blog吓台北快遊，a short but sweet trip~~~

一試難忘 :: 越式drip coffee

唔講唔知，原來越南係世界第二的咖啡出口國！去到越南，少不免要試試她的咖啡。人生第一杯的越南drip coffee係响入住的酒店飲的。嗰種香、醇、帶回甘的咖啡香加上煉奶的甜，係nespresso無法媲美的另一種美味。真係想將這味道帶返香港！响酒店職員介紹下，我地就去咗一間cafe，但實質係賣咖啡豆的小店。店員非常友善，好主動邀請我地試飲，連最貴的貓屎、藍山咖啡都可試。問我地邊度人後，又爆料話有香港人一年去佢地舖幾次入貨（唔記得幾多kilo）。响咁多咖啡豆包圍之下飲咖啡真係別有一番味道。試飲咗幾款，當然唔會空手而回。係咁易買咗少少blue mountain 同traditional（即是越南咖啡豆）。


再响街邊買埋滴漏裝置，自家製越南咖啡話咁易！



首先，杯內加煉奶。磨咖啡豆，不太幼又不太粗。磨好的咖啡粉放入滴漏裝置，加少少熱水，等咖啡粉脹少少。然後沖入滾水，等佢慢慢滴。


強烈建議用透明杯，因為淨等佢滴完同睇住佢滴係兩回事；睇住佢滴有嗰種take your mind off things｛暫時｝放下一切忙裡偷閒的感覺。

等一陣就飲得。


但唔好飲咁多，夜晚會失眠啊！

河內假期 :: 污點與亮點

先苦後甜，講咗污點先。同巴黎之旅相比其實都唔算好污點，但有啲唔開心，點解我地同法國餐咁冇緣份？

我地鎖定咗响Metropole Sofitel Hanoi Le Beaulieu食我地的法國大餐。五星酒店應該不錯啦（食物同服務）？我首先e-mail酒店，問佢攞餐牌睇吓，再問佢午餐或晚餐駛唔駛book枱。然後，我就book咗行程最後一日的中午。去到餐廳，坐低，點解得drinks menu呢？原來呢間餐廳只係晚餐先有法國菜，中午係食自助餐！！！！有冇搞錯呀！！！！第一，响我收到的menu或e-mail完全冇寫法國菜只限晚上供應；第二，佢e-mail有提及酒店其他餐廳的自助餐同high tea，點解又唔講埋我查詢的餐廳中午係食自助餐？？？？第三，呢日係旅程final day，想轉其他日子都唔得啦！！！


結果我地去咗酒店另一間餐廳食lunch，好（法式）悠閒但始終有點鬱悶。



其實間酒店好靚好有古典美，响出面同入面都很有法國風情，彷如置身巴黎。。。（我好討厭巴黎的壞人，但不得不認同巴黎真係好靚）




亮點就係：學煮越南街頭小食！去咗酒店介紹的Hanoi Cooking Centre，我地好準時就到達，首先坐低飲杯越南涼茶。之後就出發，行街市！原來我地包堂，so happy~~~~

首先去咗街舖，教我地揀靚魚露。



再嚟就進入街市的核心地帶了！呢檔賣米製品，如滑滑河粉、春卷皮。



豬耳成日食，但成塊豬耳真係未見過。



各式各樣的新鮮食材，相信對西方遊客一定好震撼。
有雞蛋、鴨蛋、仲有鵝蛋。好大隻啊！導師仲買咗隻鴨蛋連未鴨仔，返到課室俾陳某食。



越南菜式好多用上香草，呢檔就有不同種類，連香蕉花都有唔知係咩味呢？



返到課室，即刻示範第一道經典越南食物：湯牛河。正宗的湯牛河要煮8小時，一般家庭都係朝早煮、夜晚食，又或者係夜晚煮，第二朝食。我地呢次食到的就係真真正正煮咗成晚的湯頭。湯的味道。。。固然非常好，很鮮很濃，仲有很重的香料味，所有材料都很入味，好喜歡！呢種味道香港暫時未食過。原來，佢地會直接將蔥頭同薑放响火爐度燒，話將啲香氣迫出嚟喎。



食完碗美味牛河（其實剛响酒食完豐富的早餐，仲好飽，呢碗牛河真係有少少不合時），就到我地落手落腳煮了！先整dipping sauce，老師教我地雕花。呢啲咁難的，留返俾陳某吧，我都係搞拌一下就好了。



再來刨絲，整越式沙律。



包春卷，我第一次包，好好玩啊。



整甜品，香蕉糖水。先煮融糖，加水同椰槳，再落香蕉煮一煮。



最後就炸西湖蝦餅。蕃薯刨絲，加蛋槳，放响特製ladle內（型狀較一般湯殼扁），再加隻蝦响面頭，炸至金黃。


炸到咁下上，切半繼續炸。

企咗成朝，終於大功告成，可以上樓上餐廳享用我們的製成品了！企咗咁耐，真係有啲攰。導師大肚六個月，都係冇坐，體力超好～～

餐廳的環境好唔錯，最重要係，有強勁冷氣放送。要知道，出面的氣溫有４０度。而河內好多餐廳／cafe的冷氣好弱的。。。

先叫杯飲品濕吓口。河內啤酒同青檸汁。。。個青檸汁太太太好飲，我前後叫咗三杆。（汗）



上菜～～～唔講唔知自己整吧！
沙律：簡單易整，只要醬汁調配得宜，好難出錯。開胃好食啊！
春卷：配料好重要，平時唔食芫茜的我，好appreciate佢的帶出的香氣，真係畫龍點睛，令呢道菜生色不少。
炸蝦餅：平時我唔食炸物的。。。但呢個真係好特色，值得我破戒！！！



最後就係甜品，好香焦糖、蕉同椰汁味，很甜，對我來講係一種全新又陌生的味道，但一試難忘。食完已經住返到香港要再整喇。


呢餐的份量好大（仲要我地食咗很豐富的早餐，仲有牛河），因為唔想打包，坐咗好耐先可以食完。望著窗外都可以感覺到的強勁暑熱同猛烈太陽，餐廳內恬意地享受美食同一杯接一杯的冰涼飲品，感覺良好，非常chill～ 唔fine dine都食得好開心（安慰自己食唔到法國餐）。



雖然價錢相比越南物價係頗貴，人頭計同法國餐價錢相差無幾，但好值得呢～～～過了很快樂的一個早上！