最近好買 ++

終於的起心肝寫blog，今個月發生咗件好無奈的事（下面會講），加上天氣又陰又濕，完全提唔起勁。依家心情總算好返少少。。。


呢個都買咗好一陣子，到農曆年先捨得拎出嚟用。唔知係我用得衰定點，我的沖涼毛巾令我好痛苦！次次抹完身都好似受罪咁（又乾又硬又嚡又薄）。好耐之前都知道有呢間網店sleepnaked，專係賣五星酒店的牀上／浴室textiles用品，我想買佢的沖涼毛巾好耐喇。。。但成30美金一條，始終justify唔到。終於臨近聖誕時㩒掣訂，當係christmas shopping啦 ^^"""




用咗呢條「酒店貨」真係返唔到轉頭，依家抹身抹頭髮變成一種享受（真係有種莫明奇妙的幸福感）。我依家又再次struggle緊幾時㩒掣買第二條，等我有得替換吓，唔好幾日天堂又幾日地獄咁啦。。。

對佢的牀單都好有興趣！！酒店的牀單真係好滑呢，但屋企唔係酒店格局白雪雪不太好睇。



之後，就係我初上G Market！起先覺得G Market好難用，但原來仲易過淘寶，唔駛自己安排集運。第一次係咁易買咗少少飾物，質素好得，價錢吸引！仲買咗圍巾一條同一對鞋（早前去咗首爾都有買made in korea的鞋，我同陳某各一對，不約而同地覺得幾好著，又平，遊記待blog）。平靚正的貨色，好難唔上癮喎。唔知衣物質素又如何呢。





而最令我心力交瘁就係呢樣：


無錯，我係睇完星星被燒到的。部機第一次出場時（千頌伊自拍手袋拍賣）我都冇感覺，去到求婚舞時部機再次出場，可能因為配樂同我結婚時早拍晚播用咗同一首歌（Bruno Mars的Marry You），一瞬間影像加上聽覺觸動到我，慾望一下子熊熊地燃燒，一心只係諗住「志在必得」、「非買不可」！！因為呢部白色100D係聖誕／情人節限定版，到我想買時得返水尾，搵機的過程嘔心瀝血，購買時仲不幸瀨到一啲好unpleasant的嘢，搞到心煩之餘仲要折騰咗成個星期，心情又低落。最後憑住「一定要得到」的信念，終於得手！總算掃走之前的鬱悶，連太陽都出返嚟！！本身一直覺得總有一日我會入手單反，呢個契機終於都到喇！YEAH～～～


last but not least，年紀大機器開始易壞，唔想腦生菇的關係，我決定。。。學韓文！！！一來可能之前响G Market購物時因為唔識韓文搞到想買的唔知點買（佢的live chat好似有翻譯服務但次次我想live chat時都過咗office hour。。。），但最主要原因都係想多啲機會刺激吓腦細胞，依家的生活真係唔駛點用腦，再係咁離生銹的日子不遠。本來搵韓文學校都search咗一大輪，但最後都決定自學先，到真係有心想學好先再搵學校／老師。希望唔會有機會俾陳某笑我三分鐘熱度啦（我自問真係唔係三分鐘熱度的人）。

悠閑。買物 :: 台北

其實三日兩夜，時間咁短，真係做唔到啲乜。但好彩有台北的朋友約我去睇雷諾Renoir展覧，啱啱係展覧的最尾幾天，沒有錯過，真幸運！

由於台灣的展覧係唔俾影相的（係咪想遊人認真用肉眼觀賞呢），只可以响門口拍拍照。



再來就去咗間泰式按摩店，舒解吓疲累的身體。環境好不錯呢。



唔好講笑，呢兩日行的路真唔少，瞓得又唔夠。按完後，疲累的感覺消去七成。


由於悠閑的節目不多，搭埋少少敗物。出發前（只係短短三日），陳某已經不繼同我講「唔好買嘢，唔好買嘢，唔好買嘢」。唔通咁樣洗腦真係work？我去到台北行街時都不繼聽到呢把「唔好買嘢」的聲音，買物都買得十分刻制。見到想買的都唔敢買太多。最後都買咗少少比較有用的物件，買咗應該唔會俾人話的。

响台隆手創館Tailung Hands買的小工具：



意粉隔水器同埋。。。估唔估到青BB係乜？？
真係好想好想去Tokyu Hands，規模差得太太太遠了。。。。



仲有一袋不能開的秘密。。。幾時可以見天日呢？？？

弁当生活 :: 第一擊

返咗咁耐工都冇諗過帶飯返工。第一：唔鐘意隔夜飯餸；第二：唔鐘意微波爐翻熱食物；第三：懶得帶飯盒，公司附近總可以解決午餐掛。

但响呢頭返咗兩年多，餐廳選擇真係好少，四十幾圓一餐的都係食得頽，冇約人都係食大家樂，做咗大家樂常客無幾耐，開始頂唔順，令我認真諗諗帶飯的可能。依家唔帶飯的第三個原因己被推翻，接落來就諗諗點解決原因一同二。

經過一輪research，開始研究日本人的弁当，原來佢地的弁当係室溫食，唔會翻熱喎，啱晒我口胃。日本人又唔會將弁当擺响雪櫃，就算天氣熱，佢地有便當用的防菌膠膜，含wasabi等消毒成份（！！），放响食物面頭就可以有助防止細菌滋生，香港當然唔覺有得賣。但好好彩俾我搵到一個叫Gel Cool的日本品牌，佢的飯盒蓋有內置ice pack，咁唔駛放入雪櫃雪到凍冰冰，但又可以keep住食物cool唔變壞，個外型仲要幾靚吓，我本身都諗住買個好靚的日本飯盒提升自己的帶飯同食飯盒意慾，真係啱晒！！！


快快手place order，跟手訂多幾件便當accessories。非常efficient的服務，我只係揀普通air mail，一星期後就收到呢個日本寄來的包裹，好開心～～～～



包裹內容：
Gel Cool飯盒
蛋模（city'super都有得賣）
飯團模
silicone cup（見啲靚靚日式便當都有用呢啲架）



星期五收貨，我仲有個weekend諗諗可以整咩食。响等待包裹時，趁書店減價買咗呢本MASAの楽楽弁当，仲有参考吓之前買落的日本人妻食譜：




第一星期的便當生活，開始！


人生第一個弁当：自煮的三色豆雞球



冇餸唔知煮乜好。。。就咁hard boiled egg加少少木耳，有啲九唔搭八，唯有靠兔仔蛋搭救。



本來呢日唔諗住帶飯，但之前一晚返娘家食飯有好多飯餸淨，有得帶走。炒蛋呢啲乾身餸隔夜都可以，豆卜就太濃味又有汁，唔隔夜會好啲。。。



第一個星期帶咗三日飯，都不錯啦！但帶飯對我來講最困難係買一個人的餸，真係冇可能。買得多隔多日食菜同肉都不太新鮮，呢個真係要諗諗。

lunchtime sogo 速行｛連本週靚粥｝

我唔係住銅鑼灣，又唔係銅鑼灣返工，但收到情報，好想買的Staub 29cm oval做緊promotion，所以lunchtime都專誠去sogo一趟。隻29cm Oval仲要連埋我冇但又想想地要的蜂巢煎炒鍋做一set，冒住俾陳生話的風險，都要帶佢地返屋企。

收貨了！29cm oval揀咗好有層次感的灰色；24cm sautee pan就係一直想買的茄子aubergine色，好完美的配搭！連埋已有的20cm round，呢個組合都夠晒用，可以暫時收手了。呢set嘢其實仲有兩隻Staub大碗送，但我地屋企太多碗，就唔開住喇。



已經plan好，過幾日用29 oval煲湯；5月中就用24 sautee pan煮陳生的生日大餐，好期待呀～～～


同場加映孖人牌砧板，之前同陳生行街時見佢望住塊板雙眼發光，我就搵咗個機會帶埋佢返屋企（我真係個體貼太太啊）。仔細望佢的點點竹紋，真係越睇越鐘意。




今個weekend跟咗本養生書煲淮山蕃茄瘦肉粥，話適合春天食用。呢個配搭好似好風馬牛不相及，但煲出嚟好好味呀！！！！！！大力推介～～～～

入門煮婦 :: 買物篇

作為一個入門煮婦，除了要添置煮食用具外，另一樣不可缺少的就是食譜了，要不怎知道煮什麼，如何煮？所以我便大條道理由amazon UK訂了幾本食譜回來。話時話，香港的英文食譜真貴啊。




Little Paris Kitchen by Rachel Khoo
先前看電視都有聽過Little Paris Kitchen這節目，早前行過pageone見到同名的書便八掛揭開來看，內裡的食譜都不算複雜，而且不少都要用上焗爐，我可以好好利用新買的爐啦！youtube也有不少little paris kitchen的clips，主持人rachel好靚女，完全被她標準的英式口音迷倒，但我喜歡有書在手的感覺。


15-Minute Meals by Jamie Oliver
我並不是十分太喜歡JO（因為他的口音有點鄉下佬，完全以［口］音取人），但他的節目很生動搞鬼，也很欣賞他為學童及青少年所作的貢獻。買這本食譜全因為15 Minutes，雖然自已一定不會於十五分鐘內完成，但應該都是簡單又美味吧，又是很適合我這個入門煮婦。


Mastering the Art of French Cooking Vol 1 & 2 by Julia Child
早前買了staub後便上網找cast iron食譜，沿途有不少julia child的食譜彈了出來，我便八掛search下JC何方神聖。見amazon很多人都給她的食譜五星（有一位甚至是買第二套，因為之前買的都揭到爛了），我也順便買下啦。


這些食譜應夠我煮好幾年吧。我會努力的～～～


✻ ✻ 關於amazon UK的題外話 ✻ ✻
很多年前已開始從amazon UK買這買那，好處當然是足不出戶，按幾個鍵，就什麼都買到，寄到府上。當時我人在英國，還要免運費。很多我在書店找不到的，amazon都肯定有。而且，收包裹有種莫名其妙的快感。。。現在返回香港，當然少上amazon購物，但有些英文書，尤其hardcover / 貴書，amazon連寄香港的運費還要便宜，想要某東西時也可以多個選擇。

最近更發現amazon貨品的價錢很浮動，同一件物品昨天標價£17，今天可以是£10，或者£42變£32，當然也有變貴的可能。不是急用的話，可以看多一陣子才checkout。

十二月買不停手 :: 續集

十二月最後一個weekend都係買到停唔到啊。

首先响sogo買咗呢兩樣廚房用品：


cuisinart出品的焗爐同（多功能？！）手提攪拌器。一直好想煮南瓜忌廉湯的我冇籍口唔煮了。
明明同一位售貨員，我上次去佢就sell Bosch的攪拌器，今次又大力推介cuisinart，望落cuisinart的捧又真係短啲易操控，就呢部啦！


再行埋一直覺得師奶先會行的工展會（吃驚）。去咗孖人牌攤位買咗Staub焗盤俾焗爐，陳生見到套孖人牌餐具又雙眼發光帶埋返屋企（邊個話唔好買咁多無謂嘢啊？？明明就有好多刀叉匙！），其實手工同手感又真係不俗。再買咗啲無聊師奶嘢。可惜落大雨，都冇乜心機行，去完target攤位後都急急腳走了。




睇嚟陳生明年都幾有口福喎！


✾同場加映✾話說我昨日早上十一時多响sogo地下衝咗入𨋢，後面有位聲線好似楊奷嬅的女人响度講啲好無聊的嘢（七樓係廚具部，X樓係XX部 etc.... 咁我地出7樓啦）。我第一個諗法：又會有人把聲咁似楊奷嬅，唔知佢的朋友覺唔覺佢把聲似楊奷嬅呢。第二個諗法：呢個人講啲嘢都好無聊喎。去到7樓佢同親友出咗𨋢，見到紫紅色頭同紫色褸，OMG真係楊奷嬅啊，仲有丁生同RMB。我身為過氣fans都忍唔住吊咗佢尾一陣，佢响7樓都逗留咗好耐，原來佢都喜愛下廚，睇唔出呢！

末日前為瘋狂檢討

據說，天蝎座的人性格都是強烈的，不知道是否所有的天蝎座都是如此，但至少從性格成形開始，我對喜歡的事物，都有強烈的佔有慾望，係自己能力範圍內都想將佢完完全全地擁有。不如就趁末日來臨前，回顧一下以往的瘋狂事跡，好的可以保持，壞的就戒甩佢吧。

（阿嫂話過，世界末日就好似「小偷來襲」<< 呢句嘢充滿智慧，係唔會有人知道何年何日的）


1. MAC & Bourjois eye shadow & blush
當時我只係一個中六學生，學校附近有間新新地的商場叫又一城，入面有間MAC，有一日神推鬼㧬入咗呢間舖，自此就成日入去，不明所以地買一個中六學生不太需要的blush 同 eye shadow。同期我又無啦啦愛上Bourjois，當時香港仲未有，特登叫英國的朋友幫買的。仲有就係花花mary quant，兩盒夾埋有八色眼影，又係啲騎呢色。其實到依家我都唔算成日化妝（一個月最多一至半次度）。

原來我都丟咗好多喎，一粒MAC眼影都冇留底＠＠ 呢啲留低用嚟警剔自己唔好瘋狂買啲自己唔多用得著的東西。


2. Peanuts 花生漫畫
又係中六的時候開始（係咪form 5時會考讀書讀到儍咗中六咁瘋狂買物？？！！），無啦啦沉迷花生漫畫，响pageone見到的都買了，再加上之後去英國都時不時上amazon睇有冇新書出， 我估嗰幾年的peanuts漫書我都買得七七八八。唔好睇佢係漫畫，佢絕對唔係俾小朋友睇的（小朋友睇咗都不太明當中想講啲乜），反而睇睇吓會有種好酸甚至點點苦的感覺，當時的我半隻腳踏入成人世界，開始對所謂「世界」有點體會。。。花生漫畫當中有某些場景係重覆的，例如Lucy每年都揸個美式足球俾Charlie Brown踢，但每一年Charlie Brown都係落空踢唔到（如是者就廿幾年了？？！！）。但自己當時感受最深就係Sally Brown對Linus的「愛」，Linus永遠唔會明白同接受的愛。。。。好多嘢無論你如何努力付出幾多你都係永遠得不到。現實就是這樣殘酷。



其中一本買重覆咗添！！失心瘋～～～



3. 森林家族
呢個唔記得係form 5定form 6開始沉迷了，總之就係非常非常喜歡。儲儲吓，我已有一間大屋連全屋傢俬、細屋連全屋傢俬、一間餐廳連傢俬同餐廳制服，在加兔仔一家七口咁啦。嗰時真係好好好鐘意架，佢的配件的確又係非常精美。我仲好想要佢間綠屋頂大大屋添，係我的dream house，仲記得當時間大大屋sogo賣成七百幾鈫，對我嚟講係個天文數字。當然我最尾都冇買到啦。。。有一次，我幫隻兔仔換㕑師衫時，見到可愛的兔頭連住一個人形的身，我即刻覺得好恐怖好詭異，從此我就一件都冇買過了。但最激氣係我媽媽幫我剪爛晒啲盒（留起個內容的圖，話啲盒冇位放喎！！！！），我想賣返出去都唔得，唉。

我的物業包括：





終極dream house：




4. 金田一少年事件薄
小學時已經開始睇了，當時高中二年級的金田一對我嚟講係個「大哥哥」，原來係個大唔到的哥哥，今時今日我已經大過佢好多了，真搞笑。話說之前本漫畫出版時我都唔响香港住，總之就唔齊腳。結果有一年漫畫節我補購返所有我冇的，補購完嗰刻係齊腳的，但之後我又離開咗香港，啲漫畫又唔知俾屋企人收咗去邊，希望有朝一日可以一家團聚啦，我已經冇咗再要儲齊一套的衝勁喇。當然，依家我人在香港，响街見到都一定會買的。





5. 明信片
去旅遊時一定會毫不留情地買喜歡的明信片，有時入到啲art gallery都會買明信片。但最開心都係叫人寄postcard俾我，收收埋埋竟然收到咁多（相片中的只是一小部份），真係十分十分感激每位寄我postcard的朋友，有機會搬大屋一定會展示出嚟。




6. 去日本．買遮
要注意，買遮呢個動作一定係响日本發生架喎。我响香港都冇買過遮。但最吊詭的係，我根本唔喜歡擔遮，除非倒水咁落唔擔會濕晒身啦。咁點解我咁鐘意响日本買遮呢？自己都解釋唔到。但好肯定的係，當日本（被陳生）解禁後，我一定會再去買啲遮嚟。




7. 日文工具書＋關於日本的書
呢個中的毒好深啊。。。旅遊日語都買咗兩本，仲有一套書係重覆的，因為我嫌買咗的嗰套排版同顏色唔吸引，買咗另一套內容一模一樣但入面靚啲的。事實係我兩套書都冇乜掂過。。。





8. 襪褲類
不明所以地瘋狂喜歡買襪褲 / leggings之類的。主要係去日本時同淘宝，冇人比日本人更沉迷襪褲類喇，專賣襪的店都咁鬼多。日本入咗blacklist後唯有淘宝了。而家淘宝入面仲save咗好多對待買。。。幾時先買夠呢？




9. 綾賴遙封面
雖然我都係女生但我覺得綾賴遙非常可愛啊～～～有佢做封面的雜誌我都會買都捨不得丟，雖然唔會再翻睇但真係當係寶架嘻嘻。。。





要數總可以一直數落去，但都差不多。如果星期五不是世界末日的話，我希望自己唔好再買埋無無謂謂的東西，希望自己沉迷做個好太太煮多啲好嘢俾陳生（只限冬天），夏天沉迷做家務當係運動啦～～

十二月買不停手

年尾係人所共知的購物季節，我地自週年旅遊開始，就瘋狂倒水喇！

返到香港第一敗：iMac
我恨買iMac恨咗好耐好耐了，幾年前好random地買咗部macbook，其實回想起嚟有啲後悔，因為我都唔帶電腦出街，依家有咗iPad又唔興帶notebook去旅行喇，仲要macbook貴過iMac，spec又冇咁好。。。。。總之就係買錯。過咗幾年又差不多係時候換下新電腦，陳生又話要搬咗屋先可以換喎。。到搬咗屋，又諗住等埋新model出，望穿秋水，過完一關又一關，到見到網上有得賣，好難唔即刻order。

12月1日落order，剛剛星期二收貨，即刻開新舊電腦的migration assistant過data，過程又係煩。。到星期五先順利過舊電腦setting + data transfer去新電腦。我對上一部desktop，其實都係我中學時的第一部電腦，而家用返desktop，有settle down的感覺，好微妙。



mac就係mac，唔係第一部都冇太大感覺，但最特別的係用magic trackpad，可以輕易咁用左手控制，變咗可以左手一路用電腦右手寫嘢，順便訓練埋右腦添！仲有speaker聲靚過macbook好多啦～～


第二敗：Le Creuset
Le Creuset啲色靚到暈，勁吸引，點解我會買Staub呢？除咗因為喜歡佢的手感手工detail外，另一最主要原因就係，我不能去開倉的，我非常𢣷怕人多擠迫的地方，响知道開倉會平好多的大前題下，完全俾唔到理由自己平時响shop / counter用貴頗多的價錢買。但，呢期有x'mas promotion 30% off all items，我忍唔住去𥄫𥄫了。煲就點都唔會買，但㕑房餐桌小物都很吸引。結果買咗大花花碟（媽媽買給我的康寧真係質地靚好好用，但全白色冇花紋的大細碗碟，冇乜fun，有花花點綴吓餐枱好啊）、粉紅ramekin（買咗見到的最後一set粉紅）、仲有spatula set，唔知買嚟做乜？？！！！



見到一枱粉紅色，好難把持得住。。


再順手買咗幾份聖誕禮物，送禮又有自用又有送俾陳生又有。其實shopping list仲有想買的東西，心大心細，或者我下個weekend留在家煮吓飯好了。

週年遊 :: 戰利品

我部電腦終於支持唔住，响我download旅行相時同我講冇位了，一張相都入唔到。依家只係用到iPhone相，就不如分享下戰利品先，睇到買咗的東西，足以夠我地開心好一段時間。

註：
奧地利：買滿€７５退稅
瑞士：買滿CHF？？？退稅（唔知）
法國：買滿€１７５退稅

奧地利真係購物天堂啊！

• Nespresso Pixie : 平過香港同有得退稅，仲要有holiday promotion，加送€５０voucher，我地就補多€１０換咗十條capsules再加set cappuccino杯。
• Stephenplatz Zwilling shop : Staub 20cm round cocette，話唔買又買。。哈哈，可惜冇我喜歡的aubergine色（好彩，成個trip我地見百貨公司就入，都係冇aubergine），陳生揀咗紅色（佢下廚多過我，所以都要佢鐘意），於同店買埋peugeot pepper mill（下次要買埋salt mill）同磨腳捧，又有得退稅了。磨腳捧非常好好，聽聞唔會發毛喎，呢個遲啲先知，但最緊要係啱手型，揸得好舒服。
• ok蒸蛋機 : 陳生之前响德國旅遊時試過呢種蛋機的出品，一試難忘，所以決心今個trip要搵到。呢部可能係全屋唯一用散紙買的電器，只係９€９０，但已經帶給我地兩個蛋痴無限快樂了。。。。只要試多幾次，掌握好蛋量同水量，整溫泉蛋話咁易。閒閒地一次可以食六隻，用盡一星期的quota。
• 聖誕雜貨 @ vienna christmas market : 買咗舊年想買的christmas calender。但其實今年已經冇乜feel，唔多想買，但陳生都叫我買咗佢，無謂冇買都又揼心，都啱，唔買依家又會若有所失。仲有christmas market mug，心型掛圈、好得意又咁啱得返一隻的christmas nutcracker。。。依家放晒响屋企當眼處，見到都好開心啊。
• 瑞士朱古力 : 去到zurich入咗間百貨公司，入面有個「Swiss Chocolate」section，即管睇吓有乜買啦。買Lindt的話，瑞士真係比其他地方貴，只係買咗盒藍色心型swiss hearts，相信其他國家冇得賣掛。係咁易買咗少少朱古力，阿華田朱古力只係瑞士見過呢。
• amsterdam手信 : 買咗馳名tulip啦~~~ 買起咗條街啦（magnet only），木鞋仔啦（但唔啱著的）
• Melvita : 購於巴黎，真係平到喊啊，仲要退埋稅，聖誕關係買滿唔知幾多仲有一大盒freebie（橙色盒），但我都有少少失手，原本想買的唔記得咗買。。。。。
• L'Occitane : 其實只係平過香港少少，所以只係買咗少少，如香港冇的soap dish，個葉型盤同verbena soap真係襯到絕呢！！！！
• A Moveable Feast by Ernest Hemingway : 購於巴黎shakespeare & co，呢本書我搵均香港pageone、 誠品、三聯、商務。。。都唔覺有，差啲要响amazon訂了，本來諗住行吓巴黎WH Smith買英文書，但仲嫌行李唔夠重咩。。。。。少少地買一本算了。但係，去完呢個trip真係好討厭巴黎，唔知仲想唔想睇呢。
• Angelina朱古力
• 。。。再加少少無聊手信

無買的：

• Le Creuset Junior : 响Vienna行街時見到，當日諗住買nespresso機所以冇買就走，諗住去到巴黎實有啦，點知原來呢個係limited collection，巴黎已經係水尾了。。。好想買佢個粉紅breakfast set，同埋一藍一粉紅egg holder！！！到依家仲揼心中。。。

• Rody : Vienna不愧為我們的購物天堂，俾我見到Rody..... 但係紅色的，我想要黃色的啊，雖然只係€３０，但不對色不買，之後行均Zurich & Paris 的百貨公司，影都冇。
• Chanel : 完全痴線的，每一間入到去多人到好似菜市場，被祖國同胞塞滿，首先，€２０００袋真係唔expect响咁人頭湧湧的地方買，等人serve都唔知要等幾耐（可能仲要俾人暗暗白眼因為買得咁少），買貴嘢係買埋shopping experience架嘛。而且，如果响街見到同祖國大姑撞袋，真係嘔拔甩，任何嘢俾祖國同胞睇上，真係一個悲劇。
• 瑞士錶 : ohh..... 陳生要努力工作，下次去瑞士要買喇！！！
• 我的生日禮物 : 本來諗住今趟旅程揀埋生日禮物，點知，冇嘢睇啱，點好呢。。。

其實今趟都買咗好多，要買的非必要的想要的。。。都買了，尤其係咖啡機同蒸蛋機，真係令我地樂上一陣子！