可一・不可再 :: 尖沙咀咖啡弄

平時出街食都唔會特登blog，但今次真係值得紀錄一下。咖啡弄十二點開店，我地十一點半前已到，唔係第一輪入，而我地竟然繼續等！！！！


本身十一點前已經到咗尖沙咀，但見未有人開始排隊，所以去咗city'super同pageone購物一下先（原來的計劃都係去完買嘢先去咖啡弄排隊）。本來我地諗住唔係第一輪入就唔會等。點知入完人後，我地係隊頭（！），而排隊頭走咗又好似唔太甘心。心想如果下次想食都應該要十一點開始排先可以第一輪入到，又要浪費一小時排隊的話，不如今日一氣過（仲要，嗰時已經等咗一個鐘，等咗一個鐘又食唔到，怨氣好重的。。。）。今次排隊時間已經破咗我個人紀錄，陳某都話應該冇乜機會再嚟食啦，咁排法，我都極不願意再浪費我地兩個人的時間啊。。。（本身的排隊極限係半小時）


好彩排咗咁耐坐到好舒服的窗口位，心情靚返。（但可惜望出去的係投注站景，唔係別緻小街）




食物方面，三文治類好唔錯！本來以為一份夠兩個人share，因為諗住叫甜品，點知餓鬼上身，兩人食完一份我覺得唔多夠飽，結果再叫多份。



甜品揀咗草莓waffle，本身係配草莓雪糕，但作為枺茶控的我轉咗做抹茶雪糕，雪糕味道非常普通。就算以waffle同草莓嚟講，之前响首爾食到的美味程度遠遠拋離呢個好多好多條街。想再食美味的waffle睇嚟都要返去首爾。其實呢個唔係難食，但有比較之下真係差得太遠。


我同陳某都一致認為成餐的亮點係咖啡！點咗曼特寧咖啡，其實冇乜idea會係點，但一飲落－有驚喜！詞窮的關係唔太識形容，好飲的程度係。。唔。。。如果我响心情「爭少少」時可以好悠閒咁享受呢杯咖啡內心會暗喜，life is not that bad....就係咁。


結論：下次會再叫曼特寧咖啡，再explore其他啡（如：曼特寧＋巴西）。再遊台北的話一定會去（唔駛排隊等位的話）！

abc cooking :: 完

只係報咗六堂的我，已經上晒lu～


三月時學咗粟子蛋糕：


除咗緣茶之外，粟子蛋糕我都好喜愛的。但原來整個粟子蓉，又要唧出嚟，都幾煩。。。仲要自己手勢差，整得好肉酸囉～～ 味道係好的，但多工，响屋企好難自己整。


淨返兩堂，咁啱想學的兩樣响正同一日，一個上午一個下午，唔駛我走多轉。上午學的係chocolate mousse cake with nuts，其實同之前的tarte au chocolat差不多，但呢個mousse cake就唔駛焗。


真係好好好好味！！好味到拍得住响酒店食到的。喜歡濃厚dark朱古力味的一定會十分喜歡。但上堂時我的忌廉打過龍咗少少，識食的可能會覺得mousse的質感可以再滑啲，但味道真係非常好。


下午學的就係芝麻奶凍加芝麻脆脆薄片。據老師講係全個蛋糕課程最簡單的。的確係喎！個芝麻奶凍真係十分鐘就搞掂（雪凍時間另計），响屋企整返真係零難度。 我已經打算轉頭落街買芝麻醬整喇。



作為黑芝麻粉絲，梗係覺得好好味啦，我出街好少食「奶凍」之類的甜品因為我唔鐘意純奶味甜品（但我又會飲牛奶）。加咗喜歡的黑芝麻連食幾杯都得，嘿嘿。。。


結果一個15cm的chocolate mousse cake + 五杯芝麻奶凍我同陳某兩日就清晒。

泡菜國之旅 :: 出發

呢個首爾遊已經係兩個多月前的事了！本身因為遷就陳某學校時間表的關係（又要夾佢公司／上司空檔，煩），左度右度先度到一月中可以嚟個小假期。只係得幾日，歐洲等長途免問，最後只係台北（單人遊後好想再去！）同首爾之爭。最後因為想感受寒冷的冬天、而且我地兩個都冇踏足過韓國，所以決定扑鎚去首爾。

機票大約係十月頭買，當時CX有二人同行優惠，所以經旅行社買咗（之後發現經Zuji買再平少少之餘，仲可以全數碌咭）。住宿就係經airbnb網站book咗景福宫附近的apartment。



因為旅程只係四日三夜，一聽就知時間不太夠，為咗玩盡啲我地揀咗零晨機。0055起飛0530到達。但呢次零晨機真係好攞命啊。。。本身我係一個响飛機瞓到的人，只可惜出發前我手痕上CX duty free 網站訂咗嘢，响我瞓著咗的時候，我被空服拍醒埋單，ZZzZzzZZZzZ，應該係咁大個人最差的shopping experience之一。之後就唔係好瞓到了，機程又唔係長，唉～～

出到機場，剛剛miss咗第一班去景福宫的limo bus，人又眼瞓，食吓啲爽爽的首爾西北風先，令個人清醒少少。



上到巴士同司機講我地去景福宫，應該唔會唔叫我地落車掛。响巴士上順便補補眠。


坐到咁上下，有個坐前少少的韓男狂同我打眼色！原來佢想話我知next station is 景福宫，想提我地落車，佢自己都係呢個站落呢。落車後佢仲好熱心咁問我地要去邊，識唔識去，仲帶埋我地去到apartment樓下。好好的first impression！


事前同apartment的主人確認，只要我地入住之前冇人check-in我地就可以early check-in。去到apartment只係早上七點幾，天都未光齊，快快趣沖個涼再眠眠。好幸運！如果冇得check-in就要拖住喼唔知去邊，仲要係通完頂的狀態。其實小睡完都係攰，畢竟不再係十八廿二，但同冇得瞓真係爭好遠。下次都係唔好揀零晨機了（但可以玩盡全日，真係好難取捨）。


小睡片刻，早上十一點，我地就出發去街～～

最近好買 ++

終於的起心肝寫blog，今個月發生咗件好無奈的事（下面會講），加上天氣又陰又濕，完全提唔起勁。依家心情總算好返少少。。。


呢個都買咗好一陣子，到農曆年先捨得拎出嚟用。唔知係我用得衰定點，我的沖涼毛巾令我好痛苦！次次抹完身都好似受罪咁（又乾又硬又嚡又薄）。好耐之前都知道有呢間網店sleepnaked，專係賣五星酒店的牀上／浴室textiles用品，我想買佢的沖涼毛巾好耐喇。。。但成30美金一條，始終justify唔到。終於臨近聖誕時㩒掣訂，當係christmas shopping啦 ^^"""




用咗呢條「酒店貨」真係返唔到轉頭，依家抹身抹頭髮變成一種享受（真係有種莫明奇妙的幸福感）。我依家又再次struggle緊幾時㩒掣買第二條，等我有得替換吓，唔好幾日天堂又幾日地獄咁啦。。。

對佢的牀單都好有興趣！！酒店的牀單真係好滑呢，但屋企唔係酒店格局白雪雪不太好睇。



之後，就係我初上G Market！起先覺得G Market好難用，但原來仲易過淘寶，唔駛自己安排集運。第一次係咁易買咗少少飾物，質素好得，價錢吸引！仲買咗圍巾一條同一對鞋（早前去咗首爾都有買made in korea的鞋，我同陳某各一對，不約而同地覺得幾好著，又平，遊記待blog）。平靚正的貨色，好難唔上癮喎。唔知衣物質素又如何呢。





而最令我心力交瘁就係呢樣：


無錯，我係睇完星星被燒到的。部機第一次出場時（千頌伊自拍手袋拍賣）我都冇感覺，去到求婚舞時部機再次出場，可能因為配樂同我結婚時早拍晚播用咗同一首歌（Bruno Mars的Marry You），一瞬間影像加上聽覺觸動到我，慾望一下子熊熊地燃燒，一心只係諗住「志在必得」、「非買不可」！！因為呢部白色100D係聖誕／情人節限定版，到我想買時得返水尾，搵機的過程嘔心瀝血，購買時仲不幸瀨到一啲好unpleasant的嘢，搞到心煩之餘仲要折騰咗成個星期，心情又低落。最後憑住「一定要得到」的信念，終於得手！總算掃走之前的鬱悶，連太陽都出返嚟！！本身一直覺得總有一日我會入手單反，呢個契機終於都到喇！YEAH～～～


last but not least，年紀大機器開始易壞，唔想腦生菇的關係，我決定。。。學韓文！！！一來可能之前响G Market購物時因為唔識韓文搞到想買的唔知點買（佢的live chat好似有翻譯服務但次次我想live chat時都過咗office hour。。。），但最主要原因都係想多啲機會刺激吓腦細胞，依家的生活真係唔駛點用腦，再係咁離生銹的日子不遠。本來搵韓文學校都search咗一大輪，但最後都決定自學先，到真係有心想學好先再搵學校／老師。希望唔會有機會俾陳某笑我三分鐘熱度啦（我自問真係唔係三分鐘熱度的人）。

二月一記

嘩，一轉眼二月就差不多完。近來天氣凍，加上陳某出trip獨留我在家（！）的關係，呢個星期我在家得閒就閉門煲劇，用咗六日睇了某劇的1至19集。用咁多時間睇劇真係好頽廢，但我一路睇劇一路做好多鍛練的運動，希望可以踢走多餘的肉，修修線條（順道減輕睇劇的罪疚感），食完包朱古力餅都係唔好補倉喇。

近期學咗呢兩款新餅：

抹茶卷－抹茶控的我一定會學呢個！最最最喜歡佢入面的抹茶cream，好濃香啊，當然個紅豆cream都好好味啦。題外話，有日得閒去咗c'est la b 點咗個紅豆cream之類的蛋糕，一啲都唔好食，我覺得自家整呢個紅豆cream好味好多。。。

tarte au chocolat－朱古力控必學，同埋我唔識整撻皮，冇乜信心响屋企自己整到。好多嘢都係，未識整時好似好難，學咗後會覺得其實好易啫！呢個朱古力撻就係咁。咁啱我情人節早上去學整呢個，順理成章就係當晚的情人節甜品喇，好味！　

恭喜新年！

又係唔知點解好忙，忙到連利是都係年初一早上先封 -___-""" 今年的新年太暖了，周圍去有啲辛苦。。。






初二手痕整咗啲糕點食吓。


新一年別無所求，最緊要身體健康，心想的可以靠自己努力得到～～

整餅 @ abc cooking

abc cooking studio十一月中响香港新開張，唔經唔覺我已經响度上咗三堂！

第一堂係trial lesson，學整漢堡同洋蔥湯。我最想學整的就係個汁。



賣相不錯吧！學完响屋企都整咗三兩次，又多一道看門口菜式了。


（對來自日本的完全冇能力抗拒。。。）本來我係好想join料理班，但佢一嚟就係24堂，而佢leaflet又係得24道菜，但我又唔係款款都想學喎。最後決定咗join六堂的蛋糕班，粗粗地試吓先。蛋糕班有我好想學整的crepe cake（次次去greyhound必點！），急不及待就報咗十二月上的crepe cake班喇！



abc 的mille feuille（即crepe cake）同greyhound的有點不同；greyhound的夾層相信係用whipping cream而abc係用custard。但abc的都好好食，陳某食完大讚，話個custard好好味。而個crepe跟佢的材料煮法都好好味好有咬口，質感QQ，淨食都不錯（之後都有响屋企整過），真係有街買的水準！雖然係好食，但真係好花工夫，煎咁多塊crepe真係煎到儍，仲要整custard .... 所以兩樣嘢都係分開搞好啲。話說嚟緊一、二月係屋企的長老們慶生的日子，希望可以整個嚇一嚇佢地，整到的話都應該幾impressive掛。


話說做咗member後，帶朋友上trial class自己就免費呢！所以我心思思想拉陳某一齊上埋蛋糕 trial class或者麫包trial class。自己完全冇整過麫包，就學麫包啦。trial class係學整兩款包，分別係火腿卷同玉桂卷。


自家製麫包的確係幾多功夫（感覺仲難過crepe cake），真係好佩服自己在家手製麫包的人！




新鮮出爐喇！！！陳某整的明顯地靚過我的好多，我都知我冇天份喇。。。出爐即食真係幾好味呢。自己搓麫包都幾好玩，但冇一個「發酵機」的話，好似難咗少少。

2013除夕夜

話咁快就2014了，剛過去的除夕留在家，整咗個失敗的pizza（會再努力。。。），一路睇住紅白，同三位最愛（陳某、綾瀬遥、福山雅治）一齊過，真係好難忘～～

飲飽食醉，係時候收捨一下心情，準備農曆年！搵日去花園街同花墟𥄫𥄫有乜好嘢先～～

2013・14 // 回顧。展望

成個十二月忙到暈（但又唔知忙乜，打緊blog呢刻好多嘢仲未做，鳴～），仲有兩日又到新年，又係時候回顧展望，睇返舊年的展望先：

2013展望
⦿ 繼續睇多啲書啦 << 今年睇多咗，希望明年再睇多啲
⦿ 做多啲運動（呢個年年都講喇）<< 九月開始有跳鄭多燕，但十二月稍凍暫時停咗。。。
⦿ 盡量早睡早起 << 有！差不多都十一點九前瞓，放假就十點前起身，希望繼續keep住！
⦿ 好好多加利用新入手的廚房工具，提升㕑藝，提升overall主／煮婦能力！ << 同舊年比提升的空間太大了！所以2013年肯定有進步，希望keep住多煮食啦。
⦿ 如無意外希望去到兩次short trips吧。。。週年長旅遊要等好幾年後了@.@ << 真係去到兩次short trip，算係咁
⦿ 希望自制能力提升，真正有需要先買，唔好買咁多無謂嘢。<< shopping就一定有繼續但感覺上買的東西都好有用。。。我諗我有需要買一間大屋因為冇位放嘢喇。。。



2013回顧
今年各方面都平穏（感恩），最大變動就係返工方面，搵到自己的方向，就係。。。轉咗一份返三日的工！我自己真係不太喜歡「返工」（個人冇事業心，同時討厭返工指數極高，例如：逢星期六晚開始低落因為星期一要返工、隔幾日就問陳某我可唔可以唔返工／可以幾時退休等、仲要次次都加句：「唉，唔係好開心呀，我唔想返工呀。。。」，我真係有點擔心佢會唔會頂我唔順，要被訴苦三十幾年喎），但又好肯定唔返工唔得，因為太多時間好難打發，同個人會變得冇方向。。。所以依家返三日的安排實在太適合我，一方面我唔會好似以前咁討厭返工，另一方面又有相當的時間俾我做自己想做的事（睇書、興趣班、運動之類，講真如果返五日我唔會有時間跳鄭多燕）、打理屋企。。。等。有朋友問我係咪為生小朋友作呢個變動（！！！），我相信湊小朋友仲辛苦過返工！！！所以暫時都係想歎吓先， 享受吓畢業工作後好難得的半自由身狀態。


2014展望
同2013的展望差不多，希望生活得健康啲，不段充實自己，今年勝舊年。除此之外，平平安安冇穿冇爛，已經好開心了。


（某日返工忙𥚃偷閒獨自去歎咖啡）

A little history of the world by E H Gombrich

說起來真係慚愧，本來今年諗住睇多啲書，點知買嚟買去到係食譜、日文教學書等。到幾個月前諗住的起心肝睇買咗好耐的East Meets West（彭定康著），但真係。。。讀到一半真係頂唔順；其實好多年前都嘗試睇過呢本書，但當時覺得好難好heavy-going就放棄咗，到咗今時今日總算睇得明，但實在太太太悶，越睇就越唔想睇。睇吓幾時有機會再睇。。。

前排睇蘋果日報見有介紹呢本A Little History of the World，上amazon見評價好唔錯就去Pageone買啦。反正我一直都想認識多啲歷史但唔知從何著手。





我覺得呢本書真係好啱我睇。本身作者係維也納(!!!)人，佢1935年寫時係寫德文。但到90年代時，响佢家人鼓勵下，將原本的德文版翻譯做英文。因為first edition係寫俾"young readers"，所以成本書的tone都係好似聽緊爺爺講故事咁，你可以話感覺唔係好authoritative，但我覺得歷史咁complex，唔簡易啲真係好難入腦。

呢本書從石器時代講起，去到作者本身都經歷的第二次世界大戰。本身作者係歐洲人，對歐洲比較熟識（可以用六星期寫完本書！！我睇都用咗一個月），所以本書主要都係圍繞歐洲歷史，反正我都係對歐洲歷史比較有興趣。

唔睇真係唔知，其實二戰前的一兩千年歐洲都係長期處於動蕩，不停地打仗，可以生於呢個相對穏定和平的年代，真係十分感恩。而且一啲人和事並唔係想像中咁耐之前，例如，作者的爺爺原來已係經拿破崙年代的人，而作者本身亦有响維也納美泉宫見過emperor of Austria, Franz Joseph。

一直都覺得，越知得多，就越發現自己知得少，好想再搵其他歷史書睇吓，填補返啲gap，但去邊度搵本又淺白又深入的書呢。。。

題外話，本身作者係art historian，佢另一本書The Story of Art已經响我amazon shopping basket，睇吓幾時湊夠多幾本書就落扑鎚買先。