未出發先低落（再興奮）

希望２０１２年１１月已係我人生中最倒楣的月份。

出發前一星期先俾我發現，一個輕微失誤，加上天意弄人的偶然，我們不得不更改行程日期。仲要發現時已經係星期五晚上七點幾，陳生星期日就出trip了，等不到星期一打去香港Emirates office，即刻打去Dubai的廿四小時reservation hotlne。好彩，都改到日期，但所需費用足以夠我買多張來回機票，再加一晚很不錯的酒店住宿。呢個教訓畢生難忘，令我低落咗好一陣，一定會銘記於心。點知，就响出發前兩日，我收到魔鬼的e-mail .........




單程的upgrade offer，當然唔係免費，之前打電話改行程日期得知，單程upgrade每位要加港圓兩萬幾（on top of 原本張機票），相比之吓這offer絕對係irresistible，但x2的話又唔係細數目。天使同魔鬼都輕輕叫喚我，諗的時間又唔太多。改機票已經好金，但top of mind始終覺得陳生今個星期真係辛苦了，加上一週年紀念真係特別呢。。。我聽咗魔鬼支笛，去馬upgrade埋，呢份就係陳生的大禮了。

都唔好講陳生呢個trip有幾辛苦，總之我肯定這星期係佢呢幾年來最最最攞命的一周，週四晚零晨先返到家，仲要執行季，三點幾先瞓，第二朝九點返工！！為咗唔想佢咁辛苦我叫佢放工後直接出機場好了，我就拖住四個喼出機場。唔好講笑，我層樓部電梯壞咗，我首先要拉晒啲喼落一層樓。平台轉電梯又要落多一層樓。去到地面我已經熱到出汗。


好彩途中都遇到唔少好人，總算順利將四個喼帶到去機場，同陳生會合喇~~~~




去到Dubai，仲巧遇香港的朋友，响Paul坐咗陣，大家都好期待嚟緊的旅程呢。



坐business class的機會真係唔多（仲要係「自費」），對上一次係好幾年前的HKG-LONDON的國泰航班，感覺上今次坐Emirates business class更爽更正。睇咗套好戲，自從羅馬浴場後就迷上阿部寛，真係好型，冇氣流我都暈得一陣陣。



食完lunch再嚟頓beauty nap，好少落機時咁fully rested呢。本來一心想陳生响機上瞓得好啲（其中一個upgrade的原因），但佢竟然唔知忙睇啲乜，冇瞓到，激死我。

到達Vienna Airport 行李及入境大堂，發現格局同舊年好唔同，唔通係新terminal？坐埋CAT（City Airport Train）出市區，舊年落車後要經過啲爛地先到地鐡站轉車，今年一出就連接商場同各個U-Bahn入口。事隔一年，見到呢啲工程完成，唔知點解很開心，我越來越喜歡維也納了。難怪第四年成為the world's most livable city！這方面我同陳生都非常同意的。

週年遊 :: 戰利品

我部電腦終於支持唔住，响我download旅行相時同我講冇位了，一張相都入唔到。依家只係用到iPhone相，就不如分享下戰利品先，睇到買咗的東西，足以夠我地開心好一段時間。

註：
奧地利：買滿€７５退稅
瑞士：買滿CHF？？？退稅（唔知）
法國：買滿€１７５退稅

奧地利真係購物天堂啊！

• Nespresso Pixie : 平過香港同有得退稅，仲要有holiday promotion，加送€５０voucher，我地就補多€１０換咗十條capsules再加set cappuccino杯。
• Stephenplatz Zwilling shop : Staub 20cm round cocette，話唔買又買。。哈哈，可惜冇我喜歡的aubergine色（好彩，成個trip我地見百貨公司就入，都係冇aubergine），陳生揀咗紅色（佢下廚多過我，所以都要佢鐘意），於同店買埋peugeot pepper mill（下次要買埋salt mill）同磨腳捧，又有得退稅了。磨腳捧非常好好，聽聞唔會發毛喎，呢個遲啲先知，但最緊要係啱手型，揸得好舒服。
• ok蒸蛋機 : 陳生之前响德國旅遊時試過呢種蛋機的出品，一試難忘，所以決心今個trip要搵到。呢部可能係全屋唯一用散紙買的電器，只係９€９０，但已經帶給我地兩個蛋痴無限快樂了。。。。只要試多幾次，掌握好蛋量同水量，整溫泉蛋話咁易。閒閒地一次可以食六隻，用盡一星期的quota。
• 聖誕雜貨 @ vienna christmas market : 買咗舊年想買的christmas calender。但其實今年已經冇乜feel，唔多想買，但陳生都叫我買咗佢，無謂冇買都又揼心，都啱，唔買依家又會若有所失。仲有christmas market mug，心型掛圈、好得意又咁啱得返一隻的christmas nutcracker。。。依家放晒响屋企當眼處，見到都好開心啊。
• 瑞士朱古力 : 去到zurich入咗間百貨公司，入面有個「Swiss Chocolate」section，即管睇吓有乜買啦。買Lindt的話，瑞士真係比其他地方貴，只係買咗盒藍色心型swiss hearts，相信其他國家冇得賣掛。係咁易買咗少少朱古力，阿華田朱古力只係瑞士見過呢。
• amsterdam手信 : 買咗馳名tulip啦~~~ 買起咗條街啦（magnet only），木鞋仔啦（但唔啱著的）
• Melvita : 購於巴黎，真係平到喊啊，仲要退埋稅，聖誕關係買滿唔知幾多仲有一大盒freebie（橙色盒），但我都有少少失手，原本想買的唔記得咗買。。。。。
• L'Occitane : 其實只係平過香港少少，所以只係買咗少少，如香港冇的soap dish，個葉型盤同verbena soap真係襯到絕呢！！！！
• A Moveable Feast by Ernest Hemingway : 購於巴黎shakespeare & co，呢本書我搵均香港pageone、 誠品、三聯、商務。。。都唔覺有，差啲要响amazon訂了，本來諗住行吓巴黎WH Smith買英文書，但仲嫌行李唔夠重咩。。。。。少少地買一本算了。但係，去完呢個trip真係好討厭巴黎，唔知仲想唔想睇呢。
• Angelina朱古力
• 。。。再加少少無聊手信

無買的：

• Le Creuset Junior : 响Vienna行街時見到，當日諗住買nespresso機所以冇買就走，諗住去到巴黎實有啦，點知原來呢個係limited collection，巴黎已經係水尾了。。。好想買佢個粉紅breakfast set，同埋一藍一粉紅egg holder！！！到依家仲揼心中。。。

• Rody : Vienna不愧為我們的購物天堂，俾我見到Rody..... 但係紅色的，我想要黃色的啊，雖然只係€３０，但不對色不買，之後行均Zurich & Paris 的百貨公司，影都冇。
• Chanel : 完全痴線的，每一間入到去多人到好似菜市場，被祖國同胞塞滿，首先，€２０００袋真係唔expect响咁人頭湧湧的地方買，等人serve都唔知要等幾耐（可能仲要俾人暗暗白眼因為買得咁少），買貴嘢係買埋shopping experience架嘛。而且，如果响街見到同祖國大姑撞袋，真係嘔拔甩，任何嘢俾祖國同胞睇上，真係一個悲劇。
• 瑞士錶 : ohh..... 陳生要努力工作，下次去瑞士要買喇！！！
• 我的生日禮物 : 本來諗住今趟旅程揀埋生日禮物，點知，冇嘢睇啱，點好呢。。。

其實今趟都買咗好多，要買的非必要的想要的。。。都買了，尤其係咖啡機同蒸蛋機，真係令我地樂上一陣子！

Life of Pi 書 + 電影 @ UA Langham Place〔30.11.2012〕

【３０．１１．２０１２】今日呢戲都睇埋了，呢個故事始終用文字表達會好啲，幻想空間會更大，轉化做影像反而有啲失真同過火咗少少。



本來好樂觀地諗住去旅遊前寫咗呢篇blog，但我到出發日下午仲未執好行李（仲要返工！），真係諗都唔駛諗。

Life of Pi呢本書，我好耐之前已經睇咗了，當時我仲响英國，應該係２００２年佢攞咗man booker prize無耐，我就睇咗（以前仲未有買完書mark低購買日期的習慣）。估唔到差不多十年後先拍戲。





記性麻麻的我，已經不太記得呢本書的內容細節，但印象很深的是，呢本書的確好好睇，睇時最好係放緊假，因為一開始咗你基本上唔會想擺底。。直至睇完為止！很powerful很有深度的一個故事。唔知電影又拍得如何呢？我諗我要等到聖誕先有時間去睇了。

週年之旅倒數十二小時

終於，結婚一週年之旅，今晚出發！

「今晚出發」呢句話一啲都唔簡單，當中絕對有血有汗有淚，陳生的chur爆business trip，今朝零晨一點幾先到屋企（詭異的係佢已經執完行李，但我未），之前四日朝八晚二的工作時間都仲未夠，仲未計一條都要做六小時的MSc assignment（共五條），出trip期間要submit。一日幾多小時先至夠用呢？？？仲有，上星期的這天，我發現咗一樣關於呢個trip啲嘢 ....... 足以令我來回地獄又折返人間同黯然咗兩日。禍不單行，最差的事總係一齊發生，仲唔係Murphy's Law的最佳例子？？

但過去的已成為過去，做人總要向前看，所以我地決定忘記所有不快，好好地享受這個週年之旅，我仲準備咗份大大禮，諗住俾陳生一個驚喜，希望令這旅程更難忘啦～～～

追擊枕邊謎 @ UA Megabox〔4.11.2012〕

因為上次睇咗套爛片《魔鏡變變變》令到陳生的睇戲意欲很低。好不容易先叫得郁陳生同我睇呢套戲，仲要晨咁早（９：２０）去到Megabox，亦係第一次去只有七排座位的映院添。

套戲係關於一個懷孕七個月的女人Vidya從倫敦飛去印度Kolkata尋找失蹤的丈夫，但奇怪的係，各種線索都向Vidya指出佢丈夫從未响Kolkata出現過。到底當中有什麼秘密？？




結局有點點出人意表，但其實故事早段從某人對某事的反應已有暗示，但睇睇吓又好易隨劇程發展而投入於這「尋夫」的過程。戲如人生，人生如戲，到底於現實生活中，有幾多眼見的事，實情並不如你所知所想？

閱讀 :: 法國系列

為咗更投入嚟緊的法國巴黎之旅，臨出發前特登買 / 搵啲關於法國 / 巴黎的書睇吓，經過啲landmark都唔會掂行掂過吖。

法國文化關鍵詞１００



認識這１００個關於法國的字，掌握法國文化的精髓。記得有一次同朋友食飯，其中一位問：「其實點解要學XX文呢？如果好鐘意佢的美食，只要識睇menu就得啦。」她大概不明白，當你很喜歡某個國家某個文化，很想跟這地方更接近，就只有學習這個國家的語言，才可以最深入認識那國家，進入他們的世界。想當年，我差少少就去咗法國placement了，假如時光倒流事實扭轉，今日的我仲會唔會响度打blog呢。。。

Paris Revealed


呢本係完全關於巴黎的，英國作者旅居巴黎多年，將佢所見所知的巴黎赤裸地呈現。原來巴黎亦經歷過類似「文革」的歲月，依家望落保存得好靚的城市原來已經唔係最原始的古貌。仲有，巴黎除了眾所周知遍地黃金之外，如果冇落雨洗地但地下又有灘水的話都要避下，巴黎男人很喜歡隨街解手（真不文明啊）。書中仲介紹咗一啲好去處，啱晒冇買旅遊書的我，希望可以找到寧靜一角，遠離其他遊客（尤其係蝗蟲）。


Flowers for Mrs Harris


呢本真係經典，係想當年中學時的Eng Lit讀物，關於一位倫敦鐘點女傭去巴黎House of Christian Dior買裙（haute couture）的故事。中學讀的係abridged version，好奇之下我响英國時上網bid咗本原裝正版，真係多咗個「學生不宜」的chapter喎。呢本書提及的事物 -- 遠至telegram，近至franc，响2012年再讀真係有點彷如隔世。有樣不變的係，巴黎House of Christian Dior仲係响Avenue Montaigne，仲有Ile de la Cite的flower market，今次我就要去望望。


Lonely Planet French Phrasebook


借過呢本書仔俾好幾位去法國的朋友，終於輪到自己用返了。某程度上，呢本書仔都幾幽默的。例如入面的classic rejection lines，佢會教你講：I'm gay. 應該仲有效過'get lost'啦！！


睇咗呢幾本書，就係時候閉關，plan吓嚟緊的旅程，搵啲好地方帶陳生去喇！

new iMac

望穿秋水，終於等到新iMac出，理應好興奮因為真係等咗超耐，但.... 點解會冇咗DVD drive？？又唔係好想另買個drive 淨係for back up 用．．．．

魔鏡變變變 @ GH旺角〔23.10.2012〕

又係咁啱搭巴士見到trailer，雖然估到係爛戲但都照睇，因為我太喜愛綾瀨遙（俾我見到做做封面的任何雜誌都會買，仲要唔捨得扔掉）。果然一如所料，含大量不合理情節，如果我得１０歲入場睇可能好啲。但當中講到小朋友同大人各自的煩惱，大人想做細路、細路又想做大人，勉強都有少少共鳴嘅。陳生仲話有續集唔好預佢。同佢睇咁多套戲第一次咁講




綾瀨遙咁多套戲，最最最爛就係《開心直航》，爛到我睇完走去信和賣咗隻DVD，見到都眼冤！！！！
（係我第一隻睇完賣走的DVD，未睇的唔計）

圖解中華人民共和國史

說起嚟真係慚愧，話說中學時我因為「走精面」所以冇讀到中文同中史，所以一直以來我對中國歷史的認識同了解可能同小一學生相差無幾。為咗彌補呢方面的不足，行過書局時就買咗呢本看來淺易的書幫補吓。

呢本書只係非常簡單同表面地交代中國自１９２１年的發展，雖然只係好簡單的敍述，但足以令我覺得自己睇緊比鬼故更恐怖的故事，仲要係真人真事！真係唔敢想像一百年後的香港會係點，如果冇搬離香港的話，希望我們的子子孫孫有好日子過吧。

歷史就好似一面照妖鏡。唔好好的面對同修正，可怕的歷史係會重演的。

羅馬浴場 @ AMC又一城〔14.10.2012〕

通常睇戲都係我發板的，因為陳生太忙根本就冇時間留意有咩戲上。其實放工行返屋企時成日都見到《羅馬浴場》的宣傳poster，又羅馬又日本人都唔知佢搞乜鬼。咁啱陳生無意間响唔知邊度睇到《羅馬浴場》的trailer，話想睇呢套戲，日本片我實有興趣喎 。

原來呢套戲係漫畫改篇，講述阿部寛飾演的古羅馬人Lucius係一位浴場建築師，不停穿梭於古代羅馬和現代日本的澡堂之間，將於現代日本的所見帶返到古羅馬。劇程相當搞笑，尤其當Lucius以一個古代人角度將新奇的高科技設備帶返古羅馬係執行，真係需要啲幻想力先諗到 。其實日本人將make life better and fun的理念融入各種gadgets驚喜程度都令我呢個現代人讚嘆，更何況係古代人吖。男主角戲內經上赤裸上陣，佢高大的身形加精壯的線條，真係男人都覺得悅目！作為一部輕鬆笑片睇都唔錯。