首爾行 :: 觀光購物 day 3

（越來越冇新意的標題）

是日行程：

景福宫（外）⥤ 梨大 ⥤ 弘大 ⥤ 明洞

我地住景福宫，第一站當然去吓呢度望望啦，撞啱十一點換更（？）。

啲守衞好高大啊。。。我拍埋去顯得相當細粒。

下一站係梨花大學。先搵地方醫肚先。。。

又係去咗熟識的beans bin，但呢間冇士多啤梨啊！！！點可以！！！結果點咗份green tea 同 blueberry。

食飽就係時候行街。唔知係咪因為梨大係學生區，啲衫好似唔多啱我，本來睇中咗件外套的，但又俾陳某狂踩叫我唔好買。。。sigh sigh，意外地買咗兩對鞋，一對我的一對陳某，同花紋的情侣鞋啊！返到香港著咗幾次後我倆都不約而同覺得好好著。韓國製唔駛港幣300（一對），物超所值～～

當然要參觀吓美麗的梨大校園啦，好有氣質的地方，話說我地的apartment 主人都係梨大的lecturer喎。如果香港都有咁靚的大學我都想重返校園（或者搵返大學返的工）。



下一站係弘大。首先搵郵局寄postcard先。。。十分細的郵局堆滿好多的人（好多都係寄包裹，唔知係咪G Market賣家？？？！！！），好彩有得攞飛仔，但都要等三十幾個號碼(omg)。冇乜耐性等／排隊的我趁呢個時候响附近行吓先。cafe的佈置都好有心思呢。




辦完要事，又係時間醫肚。今次去咗呢間Cafe Source。唔知點解我一入呢間餐就開始狂打乞嚏流眼淚。食物不錯。




高大型男（有兩個）。。。



食完又係行街時間。同梨大一樣，冇乜嘢啱。。。乜都冇買。



又返到明洞行街了！今晚試咗啲街頭小食。



聽日就last day，發生咗件有驚無險的事。。。



➠冬日首爾遊2014☃☃
>> 泡菜國之旅 :: 出發
>> 首爾行 :: 悠閑食買行 day 1
>> 首爾行 :: 留戀新沙

首爾行 :: 留戀新沙

今日去咗呢間近乙支路的餐廳食早餐：




天氣比昨日暖咗啲呢。



陳某冇食過韓式炸醬麵，所以整返碗先，再叫咗另一款蜆湯麵。

隻碗都成呎闊！！！好顛。但我地都毫無難度清晒～～


任食的冰鎮泡菜，其實我好喜歡食泡菜呀（但响香港唔會食韓國嘢）。



下一站：新沙。好喜歡呢種唔係人來人往的休閒小區。



去咗Cafe 5 Cijung 輕鬆一下。



超可愛的擺盤同拉花～～熊仔咁得意點捨得飲呀。。。



好別緻的cafe。




行咗一陣，繼續食！

Beans Bins的士多啤梨waffle，冬天係士多啤梨當造的季節，呢碟waffle真係超乎人間的美味！自己一個都食得晒。


响新沙行完街都差不多係時候食晚飯，今晚睇日本旅遊書的推介去咗明洞的黑豚家。



越邪惡的食物越好味。



食飯後响明洞散步。




响樂天百貨買咗啲柑食。未去韓國之前都周不時响一田買韓國柑，非常清甜好味。一口氣食十粒八粒都唔係問題，好彩食太多柑唔會中毒啫。返到apartment再擺靚少少。




➠冬日首爾遊2014☃☃
>> 泡菜國之旅 :: 出發
>> 首爾行 :: 悠閑食買行 day 1

首爾行 :: 悠閑食買行 day 1

一個冇特別主題的遊記，如果題目唔想就咁叫「day 1」原來係好有難度。。。廢話少講，香港突然間已經係夏天，我呢篇咁冬日感覺的首爾遊記都係快啲寫好先。

到達apartment後抖一抖我地就出發。apartment的位置非常方便，行去景福宫站只要一兩分鐘。睇埋成個首爾地圖其實景福宫係行到去明洞，天氣暖啲的話當散步都不錯呢。

第一站係明洞，去咗旅遊書同大量遊記blog都推介的issac食個早餐。

當時氣溫只係零下幾度，要企待食住西北風咁食早餐仲要加杯凍果汁，真係好難忘！如果香港冬天都有咁凍就好了。其實我地出發前一個星期睇首爾的天氣，係零下8至10度，我諗如果我地早一個星期到埗應該笑唔出同埋行唔到街。真係有少少好彩。講返個多士，用牛油煎到香香地，啲餡都好味，真係幾唔錯～～

行行吓就見到係人都推介的beansbins，點咗個icecream waffle，據說係用haagen dazs的雪糕。一食。。。唔。。。唔識講，未食呢個之前係幻想唔到waffle可以有幾好食，又唔明只係waffle啫，啲人食完駛乜讚成咁，食完即刻知道，呢種美味只可意會，不可言傳（結果四日三夜的行程食足四次）。



之後根據韓國線人的情報去咗正官庄位於明洞的專門店買手信。仲叫個姐姐送個好靚好傳統韓風的2014月曆俾我地，好開心，呢份紀念品好特別呢～



响樂天百貨行咗一陣再食個quick dinner 就返去休息。

（全個旅程唯一的石頭飯，out fo咗。。。）

:: end of day 1 ::

➠冬日首爾遊2014☃☃
>> 泡菜國之旅 :: 出發

可一・不可再 :: 尖沙咀咖啡弄

平時出街食都唔會特登blog，但今次真係值得紀錄一下。咖啡弄十二點開店，我地十一點半前已到，唔係第一輪入，而我地竟然繼續等！！！！


本身十一點前已經到咗尖沙咀，但見未有人開始排隊，所以去咗city'super同pageone購物一下先（原來的計劃都係去完買嘢先去咖啡弄排隊）。本來我地諗住唔係第一輪入就唔會等。點知入完人後，我地係隊頭（！），而排隊頭走咗又好似唔太甘心。心想如果下次想食都應該要十一點開始排先可以第一輪入到，又要浪費一小時排隊的話，不如今日一氣過（仲要，嗰時已經等咗一個鐘，等咗一個鐘又食唔到，怨氣好重的。。。）。今次排隊時間已經破咗我個人紀錄，陳某都話應該冇乜機會再嚟食啦，咁排法，我都極不願意再浪費我地兩個人的時間啊。。。（本身的排隊極限係半小時）


好彩排咗咁耐坐到好舒服的窗口位，心情靚返。（但可惜望出去的係投注站景，唔係別緻小街）




食物方面，三文治類好唔錯！本來以為一份夠兩個人share，因為諗住叫甜品，點知餓鬼上身，兩人食完一份我覺得唔多夠飽，結果再叫多份。



甜品揀咗草莓waffle，本身係配草莓雪糕，但作為枺茶控的我轉咗做抹茶雪糕，雪糕味道非常普通。就算以waffle同草莓嚟講，之前响首爾食到的美味程度遠遠拋離呢個好多好多條街。想再食美味的waffle睇嚟都要返去首爾。其實呢個唔係難食，但有比較之下真係差得太遠。


我同陳某都一致認為成餐的亮點係咖啡！點咗曼特寧咖啡，其實冇乜idea會係點，但一飲落－有驚喜！詞窮的關係唔太識形容，好飲的程度係。。唔。。。如果我响心情「爭少少」時可以好悠閒咁享受呢杯咖啡內心會暗喜，life is not that bad....就係咁。


結論：下次會再叫曼特寧咖啡，再explore其他啡（如：曼特寧＋巴西）。再遊台北的話一定會去（唔駛排隊等位的話）！

abc cooking :: 完

只係報咗六堂的我，已經上晒lu～


三月時學咗粟子蛋糕：


除咗緣茶之外，粟子蛋糕我都好喜愛的。但原來整個粟子蓉，又要唧出嚟，都幾煩。。。仲要自己手勢差，整得好肉酸囉～～ 味道係好的，但多工，响屋企好難自己整。


淨返兩堂，咁啱想學的兩樣响正同一日，一個上午一個下午，唔駛我走多轉。上午學的係chocolate mousse cake with nuts，其實同之前的tarte au chocolat差不多，但呢個mousse cake就唔駛焗。


真係好好好好味！！好味到拍得住响酒店食到的。喜歡濃厚dark朱古力味的一定會十分喜歡。但上堂時我的忌廉打過龍咗少少，識食的可能會覺得mousse的質感可以再滑啲，但味道真係非常好。


下午學的就係芝麻奶凍加芝麻脆脆薄片。據老師講係全個蛋糕課程最簡單的。的確係喎！個芝麻奶凍真係十分鐘就搞掂（雪凍時間另計），响屋企整返真係零難度。 我已經打算轉頭落街買芝麻醬整喇。



作為黑芝麻粉絲，梗係覺得好好味啦，我出街好少食「奶凍」之類的甜品因為我唔鐘意純奶味甜品（但我又會飲牛奶）。加咗喜歡的黑芝麻連食幾杯都得，嘿嘿。。。


結果一個15cm的chocolate mousse cake + 五杯芝麻奶凍我同陳某兩日就清晒。

泡菜國之旅 :: 出發

呢個首爾遊已經係兩個多月前的事了！本身因為遷就陳某學校時間表的關係（又要夾佢公司／上司空檔，煩），左度右度先度到一月中可以嚟個小假期。只係得幾日，歐洲等長途免問，最後只係台北（單人遊後好想再去！）同首爾之爭。最後因為想感受寒冷的冬天、而且我地兩個都冇踏足過韓國，所以決定扑鎚去首爾。

機票大約係十月頭買，當時CX有二人同行優惠，所以經旅行社買咗（之後發現經Zuji買再平少少之餘，仲可以全數碌咭）。住宿就係經airbnb網站book咗景福宫附近的apartment。



因為旅程只係四日三夜，一聽就知時間不太夠，為咗玩盡啲我地揀咗零晨機。0055起飛0530到達。但呢次零晨機真係好攞命啊。。。本身我係一個响飛機瞓到的人，只可惜出發前我手痕上CX duty free 網站訂咗嘢，响我瞓著咗的時候，我被空服拍醒埋單，ZZzZzzZZZzZ，應該係咁大個人最差的shopping experience之一。之後就唔係好瞓到了，機程又唔係長，唉～～

出到機場，剛剛miss咗第一班去景福宫的limo bus，人又眼瞓，食吓啲爽爽的首爾西北風先，令個人清醒少少。



上到巴士同司機講我地去景福宫，應該唔會唔叫我地落車掛。响巴士上順便補補眠。


坐到咁上下，有個坐前少少的韓男狂同我打眼色！原來佢想話我知next station is 景福宫，想提我地落車，佢自己都係呢個站落呢。落車後佢仲好熱心咁問我地要去邊，識唔識去，仲帶埋我地去到apartment樓下。好好的first impression！


事前同apartment的主人確認，只要我地入住之前冇人check-in我地就可以early check-in。去到apartment只係早上七點幾，天都未光齊，快快趣沖個涼再眠眠。好幸運！如果冇得check-in就要拖住喼唔知去邊，仲要係通完頂的狀態。其實小睡完都係攰，畢竟不再係十八廿二，但同冇得瞓真係爭好遠。下次都係唔好揀零晨機了（但可以玩盡全日，真係好難取捨）。


小睡片刻，早上十一點，我地就出發去街～～

最近好買 ++

終於的起心肝寫blog，今個月發生咗件好無奈的事（下面會講），加上天氣又陰又濕，完全提唔起勁。依家心情總算好返少少。。。


呢個都買咗好一陣子，到農曆年先捨得拎出嚟用。唔知係我用得衰定點，我的沖涼毛巾令我好痛苦！次次抹完身都好似受罪咁（又乾又硬又嚡又薄）。好耐之前都知道有呢間網店sleepnaked，專係賣五星酒店的牀上／浴室textiles用品，我想買佢的沖涼毛巾好耐喇。。。但成30美金一條，始終justify唔到。終於臨近聖誕時㩒掣訂，當係christmas shopping啦 ^^"""




用咗呢條「酒店貨」真係返唔到轉頭，依家抹身抹頭髮變成一種享受（真係有種莫明奇妙的幸福感）。我依家又再次struggle緊幾時㩒掣買第二條，等我有得替換吓，唔好幾日天堂又幾日地獄咁啦。。。

對佢的牀單都好有興趣！！酒店的牀單真係好滑呢，但屋企唔係酒店格局白雪雪不太好睇。



之後，就係我初上G Market！起先覺得G Market好難用，但原來仲易過淘寶，唔駛自己安排集運。第一次係咁易買咗少少飾物，質素好得，價錢吸引！仲買咗圍巾一條同一對鞋（早前去咗首爾都有買made in korea的鞋，我同陳某各一對，不約而同地覺得幾好著，又平，遊記待blog）。平靚正的貨色，好難唔上癮喎。唔知衣物質素又如何呢。





而最令我心力交瘁就係呢樣：


無錯，我係睇完星星被燒到的。部機第一次出場時（千頌伊自拍手袋拍賣）我都冇感覺，去到求婚舞時部機再次出場，可能因為配樂同我結婚時早拍晚播用咗同一首歌（Bruno Mars的Marry You），一瞬間影像加上聽覺觸動到我，慾望一下子熊熊地燃燒，一心只係諗住「志在必得」、「非買不可」！！因為呢部白色100D係聖誕／情人節限定版，到我想買時得返水尾，搵機的過程嘔心瀝血，購買時仲不幸瀨到一啲好unpleasant的嘢，搞到心煩之餘仲要折騰咗成個星期，心情又低落。最後憑住「一定要得到」的信念，終於得手！總算掃走之前的鬱悶，連太陽都出返嚟！！本身一直覺得總有一日我會入手單反，呢個契機終於都到喇！YEAH～～～


last but not least，年紀大機器開始易壞，唔想腦生菇的關係，我決定。。。學韓文！！！一來可能之前响G Market購物時因為唔識韓文搞到想買的唔知點買（佢的live chat好似有翻譯服務但次次我想live chat時都過咗office hour。。。），但最主要原因都係想多啲機會刺激吓腦細胞，依家的生活真係唔駛點用腦，再係咁離生銹的日子不遠。本來搵韓文學校都search咗一大輪，但最後都決定自學先，到真係有心想學好先再搵學校／老師。希望唔會有機會俾陳某笑我三分鐘熱度啦（我自問真係唔係三分鐘熱度的人）。

二月一記

嘩，一轉眼二月就差不多完。近來天氣凍，加上陳某出trip獨留我在家（！）的關係，呢個星期我在家得閒就閉門煲劇，用咗六日睇了某劇的1至19集。用咁多時間睇劇真係好頽廢，但我一路睇劇一路做好多鍛練的運動，希望可以踢走多餘的肉，修修線條（順道減輕睇劇的罪疚感），食完包朱古力餅都係唔好補倉喇。

近期學咗呢兩款新餅：

抹茶卷－抹茶控的我一定會學呢個！最最最喜歡佢入面的抹茶cream，好濃香啊，當然個紅豆cream都好好味啦。題外話，有日得閒去咗c'est la b 點咗個紅豆cream之類的蛋糕，一啲都唔好食，我覺得自家整呢個紅豆cream好味好多。。。

tarte au chocolat－朱古力控必學，同埋我唔識整撻皮，冇乜信心响屋企自己整到。好多嘢都係，未識整時好似好難，學咗後會覺得其實好易啫！呢個朱古力撻就係咁。咁啱我情人節早上去學整呢個，順理成章就係當晚的情人節甜品喇，好味！