abc cooking :: 完

只係報咗六堂的我，已經上晒lu～


三月時學咗粟子蛋糕：


除咗緣茶之外，粟子蛋糕我都好喜愛的。但原來整個粟子蓉，又要唧出嚟，都幾煩。。。仲要自己手勢差，整得好肉酸囉～～ 味道係好的，但多工，响屋企好難自己整。


淨返兩堂，咁啱想學的兩樣响正同一日，一個上午一個下午，唔駛我走多轉。上午學的係chocolate mousse cake with nuts，其實同之前的tarte au chocolat差不多，但呢個mousse cake就唔駛焗。


真係好好好好味！！好味到拍得住响酒店食到的。喜歡濃厚dark朱古力味的一定會十分喜歡。但上堂時我的忌廉打過龍咗少少，識食的可能會覺得mousse的質感可以再滑啲，但味道真係非常好。


下午學的就係芝麻奶凍加芝麻脆脆薄片。據老師講係全個蛋糕課程最簡單的。的確係喎！個芝麻奶凍真係十分鐘就搞掂（雪凍時間另計），响屋企整返真係零難度。 我已經打算轉頭落街買芝麻醬整喇。



作為黑芝麻粉絲，梗係覺得好好味啦，我出街好少食「奶凍」之類的甜品因為我唔鐘意純奶味甜品（但我又會飲牛奶）。加咗喜歡的黑芝麻連食幾杯都得，嘿嘿。。。


結果一個15cm的chocolate mousse cake + 五杯芝麻奶凍我同陳某兩日就清晒。