閱讀 :: 法國系列

為咗更投入嚟緊的法國巴黎之旅，臨出發前特登買 / 搵啲關於法國 / 巴黎的書睇吓，經過啲landmark都唔會掂行掂過吖。

法國文化關鍵詞１００



認識這１００個關於法國的字，掌握法國文化的精髓。記得有一次同朋友食飯，其中一位問：「其實點解要學XX文呢？如果好鐘意佢的美食，只要識睇menu就得啦。」她大概不明白，當你很喜歡某個國家某個文化，很想跟這地方更接近，就只有學習這個國家的語言，才可以最深入認識那國家，進入他們的世界。想當年，我差少少就去咗法國placement了，假如時光倒流事實扭轉，今日的我仲會唔會响度打blog呢。。。

Paris Revealed


呢本係完全關於巴黎的，英國作者旅居巴黎多年，將佢所見所知的巴黎赤裸地呈現。原來巴黎亦經歷過類似「文革」的歲月，依家望落保存得好靚的城市原來已經唔係最原始的古貌。仲有，巴黎除了眾所周知遍地黃金之外，如果冇落雨洗地但地下又有灘水的話都要避下，巴黎男人很喜歡隨街解手（真不文明啊）。書中仲介紹咗一啲好去處，啱晒冇買旅遊書的我，希望可以找到寧靜一角，遠離其他遊客（尤其係蝗蟲）。


Flowers for Mrs Harris


呢本真係經典，係想當年中學時的Eng Lit讀物，關於一位倫敦鐘點女傭去巴黎House of Christian Dior買裙（haute couture）的故事。中學讀的係abridged version，好奇之下我响英國時上網bid咗本原裝正版，真係多咗個「學生不宜」的chapter喎。呢本書提及的事物 -- 遠至telegram，近至franc，响2012年再讀真係有點彷如隔世。有樣不變的係，巴黎House of Christian Dior仲係响Avenue Montaigne，仲有Ile de la Cite的flower market，今次我就要去望望。


Lonely Planet French Phrasebook


借過呢本書仔俾好幾位去法國的朋友，終於輪到自己用返了。某程度上，呢本書仔都幾幽默的。例如入面的classic rejection lines，佢會教你講：I'm gay. 應該仲有效過'get lost'啦！！


睇咗呢幾本書，就係時候閉關，plan吓嚟緊的旅程，搵啲好地方帶陳生去喇！

new iMac

望穿秋水，終於等到新iMac出，理應好興奮因為真係等咗超耐，但.... 點解會冇咗DVD drive？？又唔係好想另買個drive 淨係for back up 用．．．．

魔鏡變變變 @ GH旺角〔23.10.2012〕

又係咁啱搭巴士見到trailer，雖然估到係爛戲但都照睇，因為我太喜愛綾瀨遙（俾我見到做做封面的任何雜誌都會買，仲要唔捨得扔掉）。果然一如所料，含大量不合理情節，如果我得１０歲入場睇可能好啲。但當中講到小朋友同大人各自的煩惱，大人想做細路、細路又想做大人，勉強都有少少共鳴嘅。陳生仲話有續集唔好預佢。同佢睇咁多套戲第一次咁講




綾瀨遙咁多套戲，最最最爛就係《開心直航》，爛到我睇完走去信和賣咗隻DVD，見到都眼冤！！！！
（係我第一隻睇完賣走的DVD，未睇的唔計）

圖解中華人民共和國史

說起嚟真係慚愧，話說中學時我因為「走精面」所以冇讀到中文同中史，所以一直以來我對中國歷史的認識同了解可能同小一學生相差無幾。為咗彌補呢方面的不足，行過書局時就買咗呢本看來淺易的書幫補吓。

呢本書只係非常簡單同表面地交代中國自１９２１年的發展，雖然只係好簡單的敍述，但足以令我覺得自己睇緊比鬼故更恐怖的故事，仲要係真人真事！真係唔敢想像一百年後的香港會係點，如果冇搬離香港的話，希望我們的子子孫孫有好日子過吧。

歷史就好似一面照妖鏡。唔好好的面對同修正，可怕的歷史係會重演的。

羅馬浴場 @ AMC又一城〔14.10.2012〕

通常睇戲都係我發板的，因為陳生太忙根本就冇時間留意有咩戲上。其實放工行返屋企時成日都見到《羅馬浴場》的宣傳poster，又羅馬又日本人都唔知佢搞乜鬼。咁啱陳生無意間响唔知邊度睇到《羅馬浴場》的trailer，話想睇呢套戲，日本片我實有興趣喎 。

原來呢套戲係漫畫改篇，講述阿部寛飾演的古羅馬人Lucius係一位浴場建築師，不停穿梭於古代羅馬和現代日本的澡堂之間，將於現代日本的所見帶返到古羅馬。劇程相當搞笑，尤其當Lucius以一個古代人角度將新奇的高科技設備帶返古羅馬係執行，真係需要啲幻想力先諗到 。其實日本人將make life better and fun的理念融入各種gadgets驚喜程度都令我呢個現代人讚嘆，更何況係古代人吖。男主角戲內經上赤裸上陣，佢高大的身形加精壯的線條，真係男人都覺得悅目！作為一部輕鬆笑片睇都唔錯。

香到想食 :: L'Occitane Honey Foaming Jelly

L'Occitane Honey Foaming Jelly洗髮沐浴啫喱不定時限量發售，每次推出時家人總會買幾枝看吓門口。 到我嫁咗人，佢地就俾咗枝我等我搬離娘家都有得用吓。可能因為限量的關係，我一直都唔拾得用，轉眼間，呢期又有得賣喇！呢枝Foaming Jelly質感同香氣都好似蜜糖一樣，可想而知幾咁香甜吸引（但唔食得架）。但聽店員講呢枝嘢非常好賣，不出三四日就賣晒，下次請早 。

沖完涼香噴噴真係好開心呢。

悠閒長週末

中秋＋10。1呢個長假期由８月已經開始期待。自投身社會後，每年過咗回歸日都好灰，要捱兩個幾月先再有紅日，仲要係我最討厭的夏天，太難捱了。難得今年有呢個連假，就算七八月難頂都開心少少。

今次長假，終於都去咗講咗好耐好耐（起碼年幾兩年）的BO-LO'GNE Café & Bar。LCX的分店之前去過，覺得好一般，係招牌麵包好食。因為諗住總店點都好啲，所以俾多次機會，同陳生去總店試多次。

我地都係early bird，加上weekend & PH冇得訂位，為咗唔駛排隊，我地朝早十一點半前都到了，當然有位，但都唔係靜英英，仲有不少老外客人添。淨係睇店面，都唔係唔似去咗東京的小cafe啊，我的思日病長期都好嚴重。（呢張相取自openrice review，希望嗰位人兄唔好介意）

一心想食佢的包梗係點三文治啦（加上上次去LCX食的意粉好麻麻）。點之sandwich餡料唔係吉列就係牛肉，我唔係好食喎，咁試下拿破侖意粉啦，陳生點咗burger三文治。





我的拿破侖比想像中好（可能有上次的難食意粉做對比），但塊包真係唔會令人失望！烘到啱岩好，搽唔搽牛油都好香，陳生的三文治都好不錯，免治肉汁味道剛好。我地特登唔叫餐留肚食甜品。呢個係variation on the same theme，當然唔會差得去邊，食得我地兩個好滿足！！！




再去咗誠品，諗住買返嗰本日本咖啡店的書，uh oh，冇咗！誠品買呢啲小路（非大路）書都係有買襯早。


另一日，約咗嚟自台灣的朋友（多謝友人手信台灣人氣長龍芋頭蛋糕 ），呢位朋友掛念香港的點心，所以帶咗佢去the ONE利寶閣飲茶。四個人叫咗套餐再加幾碟點心，一枱都係。點心質素不俗，驚喜的係叉燒蛋白炒飯，足料之餘，飯炒得粒粒分明，一啲都唔油，所以就算食到好飽，都食咗兩大碗！！！

可能時間倘早的關係，環境唔算太嘈，加上美食靚境，呢餐食得幾開心。



唔知點解，利寶閣的茶具好有英式田園風，幾得意。。。。


今日係長假期最後一天，心情低落都一定的了，所以特登開咗2013年公眾假期月曆同陳生傾吓明年的假期遊樂安排。。。好快就達成初部共識  講到玩，人都開心啲！

週年遊 :: shopping wish list

不經不覺，今日已經係九個月紀念日，仲有兩個多月我地的週年遊就出發喇！！ 係時候諗諗想買乜，依家歐圓唔算貴，好多嘢都抵買過香港好多啦。

• 一定要買：vienna christmas market 的 advent calendar!!! 舊年去時冇買到，亦都係返兜vienna的其中一個原因。
• LINDT!!! 朱古力，朱古力，朱古力，好多味同款香港都唔見有，我呢個chocolate junkie食咗成年都未覺得厭。
• RODY!!! 雖然香港都有，呢期Babies'R'us仲要做緊９折，但會唔會有機會歐洲平啲呢？到時行多啲百貨公司嬰兒部同玩具店先。

• 欠陳生的生日禮物，已經鎖定目標，希望快快搵到。
• 有諗過買個staub...... 但咁鬼重，真係攞嚟托喎。 

好喜歡aubergine呢隻色，但唔想有「因為買咗個煲，所以要多啲下廚」的壓力......... 隨緣吧（今年夏天以來都冇煮過飯。。。）

• 一場去到瑞士，好想買返隻手錶戴吓吖。。。
• Melvita!!! 都唔知係香港貴到喊定係歐洲平到喊，總之嗰邊就抵買啦！貨品種類又多啲。
• 反而同集團的l'occitane價錢同香港又差唔遠，咁奇怪，有平的話都好想買。
• 行巴黎的舊書店，會唔會搵到啲舊版名著呢？

暫時諗到咁多，行李都未有耐超重嘅。

Nothing to Envy。我們最幸福

作者一開始從二十世紀初講起，講到朝鮮戰爭，南北韓分裂，就開始插入不同「脫北者」的故事。６位主角來自不同背境不同階層，但都係生活於這鐵幕國家，一同經歷了１５年的混亂時代：金日成逝世、飢荒，然後有各自的原因同方法離開北韓。

呢本都算係我近年最快睇完的一本書，節奏快、冇悶場。最吸引我的係當中荒謬但真實的情節。睇呢本書前我冇特別了解過共產國家其實如何，但睇到某啲位簡直覺得匪夷所思，原來操控人民的思想，並不是一件太難的事，但作為一個旁觀者，真係覺得無比心寒。腦子被洗得tup tup hum的都算罷，最慘就係一少部分人暗地裡感到不對勁，又或者直情知道世界並不如你「應該」所認識的，深深感受到這種令人心痛的無助感，但又如何？there is nothing you can do。中學時書上有句嘢，ignorance is a blessing in disguise，嗰時入世未深唔知句嘢想點（當時真係好puzzled），但依家深深明白了，乜都唔知，盲目的相信「我們最幸福」可能真係開心啲。


基本上書中各主角於書中的結局都係一樣的：離開北韓，用唔同的途徑去到南韓，展開新生活，從此脫離恐怖的政權。但各位主人翁的下場並不是理所當然的happily ever after。自由的代價，就係你唔會知道幾時先可以和最愛的子女、父母、愛人再見，暗地你知道答案係「永遠」（除非北韓政權於他們的有生之年瓦解）。更甚的是，仍在北韓的親人很大可能因為你「變節」而被送去勞改。能從飢荒中活下來，本身就是很可怕的回憶，書中主角為了求生，迫於本能要收起人性美好的一面，變得麻目不仁，當自己都冇啖好食又點可能分享？他們都「做了」或「冇做」某些事先可以生存至今，往事就如一場永遠都發唔遠的惡夢，良知永遠受到責備。





讀畢此書，不禁問自己：如果我生活於這國度，我會係被洗腦的，定係清醒的？我會唔會質疑這「美好」的世界，從小到大被灌輸的價值觀同世界觀？我有冇勇氣逃亡？我會唔會想知道自己百份百信任的國家、絕對崇拜的dear leader，原來係一個又一個的政治謊話？接唔接受到自己被政府背叛的殘酷現實？


作者的敘述相當細緻，雖然情節上好多催淚位，但文筆中立不搧情，作為認識呢個國家的入門，值得一看。

超人氣店家成功開業指南。

從來都覺得閱讀係一個好的習慣，細時暑假阿媽都會帶我去圖書館hea，都係美好的童年回憶一部份。一直到讀大學時都可以keep住on and off 睇吓書，但返工係的時間簡直就唔見駛，雖然我都會keep住買書，但睇書的時間少之又少，呢個item年年都係我的new year resolution list，今年總算好少少，我响12Q3睇完一本書啊！！！真係要keep住至得。為咗鼓勵自己多啲睇書，開返個blog分類俾佢先，如果一年後都係得一兩篇post，好肉酸架嘛。

呢本書係响香港誠品買的，開業３週後就貢咗去，仲要特登早少少，星期六朝早十一點前就去到了（對我嚟講已經好早架喇）。人流都唔算少但總算有位行。因為今次有target，所以好快就買咗本書返去。





某日放日返到屋企，天仲未黑，順手攞起本書睇，加埋窗台的斜陽，感覺非常好（可能只係差杯咖啡）。雖然我都冇乜可能會開自己的小店，但睇到書中的店主如何充滿理念，賣包的每日零晨１點半起身搓麵團、賣古物的去英國尋寶、熱愛攝影的開晒相店 + cafe & shop 等志同道合的人可以一路等曬相一路hea，與同道中人交流．．．可以為實踐自己的夢想而努力，將自己喜愛的事物同人分享，係一件令人興奮鼓舞的事。

睇到咁上下，又係時候返娘家食飯，重投現實的懷抱。

同系列有另一本專講咖啡店，下次行開誠品睇吓仲有冇先。