從曼谷到福岡 :: 邂逅螢火蟲

依家諗返起都好似係好耐之前的事了。

話說我地年頭的時候已經訂好package諗住六月頭端午節假期去曼谷行下食吓spa吓。。。嘆吓休息吓咁。誰不知出發前一兩星期，曼谷軍事政變，開始戎嚴.... etc。其實睇新聞覺得曼谷市面係和平的，但呢個時候去點都好難好relax 咁享受呢個假期，好緊張地玩真係不太好，再加上陳某都幾唔想去（不停話好危險，EE哦哦），思前想後，响出發前一星期決定取消曼谷之旅（但我花咗好多時間心機搵同book spa / 餐廳，鳴，但一個唔盡興的假期真係浪費假期啊），推倒重來，臨時決定改去福岡＋九州！好耐冇來的日本，終於有機會再嚟喇～～～～（心情好激動）

只有七日plan行程，時間緊迫！响香港的七日快快趣睇福岡九州旅遊書大概有個概念，決定要整九州JR Pass，etc。其實香港睇咗的作用都不大，因為六七成行程係去到日本先諗，之前一晚計劃聽日去邊，搞到晚晚都好遲先有得瞓。

可能因為太遲book package，冇得直飛福岡，坐CX經台北去福岡的班次（我book完一陣先為意要停台北。。。）。因為係同一架機香港⇒台北⇒福岡，我地可以選擇响台北落機行個圈或者留响機上，咁就梗係落啦！仲好開心响手信店買鳯梨酥，買完先醒起回程都會停台北。

著陸福岡時已經晚上九點。今次落機好順利，行李一埋位就出嚟，坐埋的士到酒店先至九點半！！半小時生活圈！！真係半小時前先响飛機度行落嚟咋。令我有點懷念以前的啟德機場，因為娘家去啟德車程都只係三四分鐘。

唔好以為咁夜去到就係時候瞓覺，其實呢個day 1 都有安排行程㗎，就係去睇螢火蟲。好彩出發前like咗福岡的Facebook page，知道初夏有啲地方會有螢火蟲睇。但睇蟲的日子係六月上半的星期五、六、日晚，我地星期日到星期五返港喎！唯有把握呢個day 1 去睇啦。好彩螢火蟲開放到晚上十一點，我地九秒九離開機場，時間都算充裕。

地點係唐人町駅一間叫妙法寺的寺廟，離車站大約五分鐘步程。去到寺門口就見到個和尚企响度，問我地係咪嚟睇ホタル（螢火蟲），同我地講解吓注意的地方，就俾我地入內參觀。

講咗咁耐，一幅相都冇！因為入面係禁止攝影，就算可以拍攝都未必影到啲乜，因為入面都好黑。但我相信，最美麗的畫面用心眼記得最清楚。講真，螢火蟲的數量不太多（聽聞六月中會再多啲），畫面未至於好震撼，但响黑麻麻的寺廟加上夜晚涼涼的夏風睇住一點點光飄飄吓，我想起日劇蛍の光，好有初夏的情懷呢。

賞完螢火蟲和尚就俾咗呢張遊覧証我地留為紀念。

真係好難唔愛上日本啊（驚嘆）（驚嘆）

很短但很開心的day 1～～

*:ღ ╠ ╣ a Ρｐy ღ:*  ƪ(Ơ̴̴̴̴̴̴͡.̮Ơ̴̴͡)ʃ   ✰(◍ ⚈᷀᷁ڡ⚈᷀᷁  ◍)✰  *:ღ ╠ ╣ a Ρｐy ღ:*

首爾行完結篇 :: 執返身彩

最後一日，為咗買响新沙睇中咗的一個袋（購物購物～）十點度去到新沙。

好喜歡～冬日的晨光。去到較北的地方天空的藍好美。



本來諗住食埋個士多啤梨waffle，點知beansbin十一點先開，唯有去另一間新沙大道的cafe Coffeesmith。

超高樓低、強勁空間感、寫意的街境。。。香港應該冇咁chill的空間。仲要我地咁早去到，cafe冇其他人。感受一下早晨的寧靜。杯奶茶好好飲，夠香滑，絕對唔會差過港式奶茶。



臨走前終於食到～～清甜的士多啤梨，鬆軟的waffle..... 依家都仲好掛住啊！



之後去北村，食咗個late lunch就返apartment攞行李出機場。好彩apartment今日又係冇人check-in所以我地唔駛擔心行李放响邊。




其實呢篇的重點係响機場的一件事：我地搭夜晚1950的機，我1930發現唔見咗passport！！！！

1930的時候陳某剛响舖頭買完手信，其實我地都遲遲地，仲要閘口不近，坐無人駕駛先去到閘口上機。點知臨上無人駕駛我就發現passport不見了！！！呢個時候應該去上機定搵護照呢？？

即刻返轉頭沿之前行過的地方搵，冇；去我買嘢有show過passport的店問有冇跌响嗰度，冇。勁急勁擔心，諗起陳某買手信的舖頭前有個information desk，即刻跑返去問。。。有！！

之後就擔心上唔到機！1950係以我所知最夜的機，唔想响機場過夜啊。返到去無人駕駛站時已經1945，仲要等一陣先有車。。。又驚又心急。呢個時候去到閘口一定過咗1950了。落車上escalator，上到去已經有位（好靚仔好高大的男）職員舉晒牌搵我地，佢見到我地急跑都知道要搵的人係我地，即刻同我地一齊跑（！），一路跑一路同同事用walkie-talkie溝通（應該係講遲到的兩個蛋散嚟緊之類。。。）。要再次强調的係個職員非常高大靚仔仲要著晒西裝，同我地一齊跑去閘口的場景相當爆笑。去到閘口已經上氣不接下氣，另一位職員仲問我are you okay（我expect會俾人黑面，點知仲相當nice）。成架機好明顯係等我地，我地上到機好快就關門。最終架機遲咗少少depart，非常不好意思。

一上到機覺得勁好彩！！我响香港的尋回失物運係零。臨上機先跌passport，仲要搵得返同上到機，好感恩，非常感激執到本護照拎去information的人。如果真係搵唔返我應該以後唔想再嚟首爾，太大陰影。



➠冬日首爾遊2014☃☃
>> 泡菜國之旅 :: 出發
>> 首爾行 :: 悠閑食買行 day 1
>> 首爾行 :: 留戀新沙

>> 首爾行 :: 觀光購物 day 3

首爾行 :: 觀光購物 day 3

（越來越冇新意的標題）

是日行程：

景福宫（外）⥤ 梨大 ⥤ 弘大 ⥤ 明洞

我地住景福宫，第一站當然去吓呢度望望啦，撞啱十一點換更（？）。

啲守衞好高大啊。。。我拍埋去顯得相當細粒。

下一站係梨花大學。先搵地方醫肚先。。。

又係去咗熟識的beans bin，但呢間冇士多啤梨啊！！！點可以！！！結果點咗份green tea 同 blueberry。

食飽就係時候行街。唔知係咪因為梨大係學生區，啲衫好似唔多啱我，本來睇中咗件外套的，但又俾陳某狂踩叫我唔好買。。。sigh sigh，意外地買咗兩對鞋，一對我的一對陳某，同花紋的情侣鞋啊！返到香港著咗幾次後我倆都不約而同覺得好好著。韓國製唔駛港幣300（一對），物超所值～～

當然要參觀吓美麗的梨大校園啦，好有氣質的地方，話說我地的apartment 主人都係梨大的lecturer喎。如果香港都有咁靚的大學我都想重返校園（或者搵返大學返的工）。



下一站係弘大。首先搵郵局寄postcard先。。。十分細的郵局堆滿好多的人（好多都係寄包裹，唔知係咪G Market賣家？？？！！！），好彩有得攞飛仔，但都要等三十幾個號碼(omg)。冇乜耐性等／排隊的我趁呢個時候响附近行吓先。cafe的佈置都好有心思呢。




辦完要事，又係時間醫肚。今次去咗呢間Cafe Source。唔知點解我一入呢間餐就開始狂打乞嚏流眼淚。食物不錯。




高大型男（有兩個）。。。



食完又係行街時間。同梨大一樣，冇乜嘢啱。。。乜都冇買。



又返到明洞行街了！今晚試咗啲街頭小食。



聽日就last day，發生咗件有驚無險的事。。。



➠冬日首爾遊2014☃☃
>> 泡菜國之旅 :: 出發
>> 首爾行 :: 悠閑食買行 day 1
>> 首爾行 :: 留戀新沙

首爾行 :: 留戀新沙

今日去咗呢間近乙支路的餐廳食早餐：




天氣比昨日暖咗啲呢。



陳某冇食過韓式炸醬麵，所以整返碗先，再叫咗另一款蜆湯麵。

隻碗都成呎闊！！！好顛。但我地都毫無難度清晒～～


任食的冰鎮泡菜，其實我好喜歡食泡菜呀（但响香港唔會食韓國嘢）。



下一站：新沙。好喜歡呢種唔係人來人往的休閒小區。



去咗Cafe 5 Cijung 輕鬆一下。



超可愛的擺盤同拉花～～熊仔咁得意點捨得飲呀。。。



好別緻的cafe。




行咗一陣，繼續食！

Beans Bins的士多啤梨waffle，冬天係士多啤梨當造的季節，呢碟waffle真係超乎人間的美味！自己一個都食得晒。


响新沙行完街都差不多係時候食晚飯，今晚睇日本旅遊書的推介去咗明洞的黑豚家。



越邪惡的食物越好味。



食飯後响明洞散步。




响樂天百貨買咗啲柑食。未去韓國之前都周不時响一田買韓國柑，非常清甜好味。一口氣食十粒八粒都唔係問題，好彩食太多柑唔會中毒啫。返到apartment再擺靚少少。




➠冬日首爾遊2014☃☃
>> 泡菜國之旅 :: 出發
>> 首爾行 :: 悠閑食買行 day 1

首爾行 :: 悠閑食買行 day 1

一個冇特別主題的遊記，如果題目唔想就咁叫「day 1」原來係好有難度。。。廢話少講，香港突然間已經係夏天，我呢篇咁冬日感覺的首爾遊記都係快啲寫好先。

到達apartment後抖一抖我地就出發。apartment的位置非常方便，行去景福宫站只要一兩分鐘。睇埋成個首爾地圖其實景福宫係行到去明洞，天氣暖啲的話當散步都不錯呢。

第一站係明洞，去咗旅遊書同大量遊記blog都推介的issac食個早餐。

當時氣溫只係零下幾度，要企待食住西北風咁食早餐仲要加杯凍果汁，真係好難忘！如果香港冬天都有咁凍就好了。其實我地出發前一個星期睇首爾的天氣，係零下8至10度，我諗如果我地早一個星期到埗應該笑唔出同埋行唔到街。真係有少少好彩。講返個多士，用牛油煎到香香地，啲餡都好味，真係幾唔錯～～

行行吓就見到係人都推介的beansbins，點咗個icecream waffle，據說係用haagen dazs的雪糕。一食。。。唔。。。唔識講，未食呢個之前係幻想唔到waffle可以有幾好食，又唔明只係waffle啫，啲人食完駛乜讚成咁，食完即刻知道，呢種美味只可意會，不可言傳（結果四日三夜的行程食足四次）。



之後根據韓國線人的情報去咗正官庄位於明洞的專門店買手信。仲叫個姐姐送個好靚好傳統韓風的2014月曆俾我地，好開心，呢份紀念品好特別呢～



响樂天百貨行咗一陣再食個quick dinner 就返去休息。

（全個旅程唯一的石頭飯，out fo咗。。。）

:: end of day 1 ::

➠冬日首爾遊2014☃☃
>> 泡菜國之旅 :: 出發

可一・不可再 :: 尖沙咀咖啡弄

平時出街食都唔會特登blog，但今次真係值得紀錄一下。咖啡弄十二點開店，我地十一點半前已到，唔係第一輪入，而我地竟然繼續等！！！！


本身十一點前已經到咗尖沙咀，但見未有人開始排隊，所以去咗city'super同pageone購物一下先（原來的計劃都係去完買嘢先去咖啡弄排隊）。本來我地諗住唔係第一輪入就唔會等。點知入完人後，我地係隊頭（！），而排隊頭走咗又好似唔太甘心。心想如果下次想食都應該要十一點開始排先可以第一輪入到，又要浪費一小時排隊的話，不如今日一氣過（仲要，嗰時已經等咗一個鐘，等咗一個鐘又食唔到，怨氣好重的。。。）。今次排隊時間已經破咗我個人紀錄，陳某都話應該冇乜機會再嚟食啦，咁排法，我都極不願意再浪費我地兩個人的時間啊。。。（本身的排隊極限係半小時）


好彩排咗咁耐坐到好舒服的窗口位，心情靚返。（但可惜望出去的係投注站景，唔係別緻小街）




食物方面，三文治類好唔錯！本來以為一份夠兩個人share，因為諗住叫甜品，點知餓鬼上身，兩人食完一份我覺得唔多夠飽，結果再叫多份。



甜品揀咗草莓waffle，本身係配草莓雪糕，但作為枺茶控的我轉咗做抹茶雪糕，雪糕味道非常普通。就算以waffle同草莓嚟講，之前响首爾食到的美味程度遠遠拋離呢個好多好多條街。想再食美味的waffle睇嚟都要返去首爾。其實呢個唔係難食，但有比較之下真係差得太遠。


我同陳某都一致認為成餐的亮點係咖啡！點咗曼特寧咖啡，其實冇乜idea會係點，但一飲落－有驚喜！詞窮的關係唔太識形容，好飲的程度係。。唔。。。如果我响心情「爭少少」時可以好悠閒咁享受呢杯咖啡內心會暗喜，life is not that bad....就係咁。


結論：下次會再叫曼特寧咖啡，再explore其他啡（如：曼特寧＋巴西）。再遊台北的話一定會去（唔駛排隊等位的話）！

abc cooking :: 完

只係報咗六堂的我，已經上晒lu～


三月時學咗粟子蛋糕：


除咗緣茶之外，粟子蛋糕我都好喜愛的。但原來整個粟子蓉，又要唧出嚟，都幾煩。。。仲要自己手勢差，整得好肉酸囉～～ 味道係好的，但多工，响屋企好難自己整。


淨返兩堂，咁啱想學的兩樣响正同一日，一個上午一個下午，唔駛我走多轉。上午學的係chocolate mousse cake with nuts，其實同之前的tarte au chocolat差不多，但呢個mousse cake就唔駛焗。


真係好好好好味！！好味到拍得住响酒店食到的。喜歡濃厚dark朱古力味的一定會十分喜歡。但上堂時我的忌廉打過龍咗少少，識食的可能會覺得mousse的質感可以再滑啲，但味道真係非常好。


下午學的就係芝麻奶凍加芝麻脆脆薄片。據老師講係全個蛋糕課程最簡單的。的確係喎！個芝麻奶凍真係十分鐘就搞掂（雪凍時間另計），响屋企整返真係零難度。 我已經打算轉頭落街買芝麻醬整喇。



作為黑芝麻粉絲，梗係覺得好好味啦，我出街好少食「奶凍」之類的甜品因為我唔鐘意純奶味甜品（但我又會飲牛奶）。加咗喜歡的黑芝麻連食幾杯都得，嘿嘿。。。


結果一個15cm的chocolate mousse cake + 五杯芝麻奶凍我同陳某兩日就清晒。